士多啤梨營養高熱量低，好多小朋友都愛食。12月至4月係士多啤梨當造嘅季節，唔少媽媽都會買士多啤梨比小朋友食，甚至同小朋友去摘士多啤梨食！不過有樣野你一定要知，就係士多啤梨多農藥，一定要洗乾淨先好放入口，洗嘅方法好重要，一齊學下！

清洗方法

士多啤梨比較低矮，果實多汁，容易受害蟲，所以會用較多農藥，加上表面有凹凸，易殘留農藥。

1. 洗之前千其唔好拔走葉蒂！千其唔好拔走葉蒂！千其唔好拔走葉蒂！（很重要所以要講三次）因為拔走葉蒂有機會令到農藥流入士多啤梨內，全部食晒落肚！

2. 用水連續沖洗士多啤梨幾分鐘，可以沖去表面細菌、農藥、蟲同污染物。

3. 再用洗米水＋淡鹽水泡浸 3-5分鐘，鹼性嘅洗米水可以分解農藥，淡鹽水就可以令士多啤梨表面嘅昆蟲同蟲卵浮起。（如無洗米水，淨用淡鹽水都OK）

4. 再用凍水沖洗一次就可食用

保存方法

摘完一大堆士多啤梨就咁放係雪櫃好快壞！點樣可以保存多幾日？

1. 未食嘅士多啤梨千其唔好洗，一洗咗就更快壞。

2.揀走已經腐爛嘅士多啤梨，否則會令其他士多啤梨更快腐爛。

3. 將士多啤梨放入一個密封的盒中，再放入雪櫃（最好用玻璃樽）

最好買咗返嚟盡快食用！

士多啤梨營養多

100g士多啤梨只得27卡路里、但就含有1.1g纖維同77毫克維他命 C！維他命 C含量遠勝藍莓、車厘子同紅莓，維他命C具有美白功效，媽媽們不妨多食！士多啤梨仲有鞣花酸（ Ellagic acid），根據研究顯示，鞣花酸有助消除體內致癌物質，對預防癌症好有幫助。

資料來源：蘋果日報、adventuresofabusybee