你既小朋友訓教時，有冇試過以下呢D的情況？又或者有以下既疑惑？如果有，咁你就要留意啦！

1. 點解BB成日半夜醒左？

2. 半夜醒是否代表睡眠有問題？

3. 點解小朋友半夜醒左之後唔肯自己再訓返，要依賴家長氹先肯再訓？

4. 乜野係入睡條件？佢係咪會令到小朋友成日半夜醒既元兇？

5. 點樣可以處理甚至解決小朋友睡眠、半夜醒既問題？

BB半夜易醒，與睡眠階段有關

無它既，一個初生BB，又點會識得分日頭同夜晚？所以，BB日訓夜訓，容易夜晚醒其實係正常既，呢個情況亦同「淺睡」有關，情況就好似大人一樣，日頭訓得多，夜晚都會訓唔著 / 好醒訓一樣。 另外，初生BB睡眠其實係不斷經歷淺睡至熟睡呢D循環階段，嬰幼兒會係每個循環之間稍稍醒來，而每個循環階段所需既時間亦會由嬰兒時期開始慢慢逐漸增加，姐係每次由淺睡至熟睡的時間會增加，姐係越大個，半夜醒既機率會慢慢變少，家長唔洗咁擔心啦！

點解小朋友半夜醒左之後唔肯自己再訓返，要依賴家長氹先肯再訓？

呢樣就係同「入睡條件」有關喇！好簡單，假如小朋友話要食粒糖先肯訓，而家長呢個時候又真係俾粒糖俾小朋友食既話，咁久而久之小朋友就會養成呢個壞習慣。又或者，如果BB半夜醒就喊，而家長呢個時候又走去即時抱起、輕拍或者搖動BB，BB就會將睡意同呢D不恰當既情況連繫，藉住啼哭黎叫家長抱抱自己，慢慢BB仲會識得強化啼哭，或者甚至其他行為，黎誘使家長氹自己，最終BB可能因為咁而訓練成為 trained night crier 。所以，嬰幼兒既睡眠問題與他們缺乏自行入睡既能力，係與照顧者不恰當既強化行為有關。

處理嬰幼兒的睡眠問題及入睡的方法 

1. 採取「觀望」態度 – 「克制安撫法」（Controlled comforting / Graduated extinction）

如果BB半夜醒左哭啼時，父母首先要確保BB安全及有無其他需要，例如肚餓、要換片、太熱等等， 千其唔好急住去氹BB，因為BB可能只需幾分鐘時間便會安靜下來，慢慢再入睡。如果過了5分鐘，BB仍然喊緊，父母便可在此時去BB身邊，但亦不要即時抱起BB，只花一分鐘時間安撫BB，然後離開。用意係俾BB知道你會關注佢，係佢有需要時，隨時會係佢身邊照顧佢。如果BB仍然繼續喊，咁父母就要再等比較長既時間，才可以回到BB身邊，然後重複剛才進行過既處理方法；但注意呢個方法並不是鼓勵你留下來陪住BB。

2.   「系統性忽視法」（Systematic ignoring / Extinction / “Crying it out”）

與「克制安撫法」相似但較為嚴格。父母檢查了排除因身體不適或需換片既可能，對BB哭叫無動於衷，亦唔好去BB房間查看BB是否安好。原則上呢樣做法對BB無害，反而令BB快D學識自己入睡。但係，呢個方法需要父母確信BB只係要求人注意佢，並無其他原因。

3.  「陪伴遞減法」（Camping out）

如果家中係因為環境所限而需要將嬰兒床放係自己床邊，又或者對BB較放心唔落，可用此法。

當BB半夜醒時，家長可在附近床上扮訓著，讓BB以為你係陪住佢訓，直到BB再入睡為止。除非見到BB神色有異或者有危險，否則唔好理會BB的哭叫聲。

 4. 建立適時睡眠的習慣

小朋友主要休息時間包括白晝及晚間睡眠，而午睡次數及時間會隨年齡增長而逐步減少，大約5歲時會減到一次或完全唔需要午睡。由於晚間醒來與缺乏睡眠和長時間留係床上有關，父母應按小朋友成長需要，給予適當作息時間及避免過度缺乏休息 (sleep deprivation)。所以，固定晚上訓教時間可幫助建立日夜睡醒節律 (circadian sleep-wake rhythm) ，令小朋友易D入睡。

5. 建立貫徹的睡眠常規

BB兩、三個月大既時候，可以開始建立睡眠常規。係訓教前20至45分鐘，父母可安排一D無使用電視或任何電子熒幕產品既親子活動，以輕鬆、舒緩、孩子喜愛、平靜為主既正面活動，例如沖涼、講故事、靜態遊戲、唱催眠曲、聽輕音樂等等。

要注意，呢D臨近關燈既常規活動要係BB訓教既地方內進行，提供舒適環境同幫助BB分辨日夜，都有助安睡。

6. 「先退後進法」（Positive routine / faded bedtime with response cost）

呢個方法適用於一歲或以上及唔願訓教既小朋友。家長可先建立一系列輕鬆的睡前活動引發睡意，如小朋友未能入睡，父母需將孩子帶離床，直至有睡意先再上床休息，而睡眠時間初時會因為咁而延遲。但當睡前活動同睡意連繫，小朋友可以持續幾晚係固定時間訓教時，家長提前入睡時間 (如15分鐘)。家長亦應訂立有規律既起床及午睡時間。

以上睡眠方法對BB / 小朋友有害嗎？

相關的研究顯示以上方法不但不唔會對幼兒本身、親子關係或母親情緒帶來任何長遠影響，而且仲

可以為幼兒日間行為表現以為父母心理健康及質素帶來正面效果添。但如果父母依然唔放心，亦可以搵相關既專業人員提供建議同輔助。

(資料來源：衛生署家庭健康服務)