係呢個乜都貴嘅時代，慳家媽咪除左開源仲要節流，d人成日話BB野唔慳得，見到大牌子就買，但靚叻媽就覺得唔慳得唔代表唔用，只係可以自己動手整或許揾個平d又好用嘅代替品！（有時d代替品仲好用過d牌子野呀！）一黎用得安心，二黎荷包開心！其實靚叻媽儲埋儲埋都好多心得咖～

1.自製泥膠

泥膠好易痴到污糟野，玩一兩次就要掉好唔環保又晒錢！所以平時我會自製泥膠比阿仔玩，起碼我知佢用咩整，又平好多！

材料：一杯鹽，一杯麵粉，一杯水，一湯匙油，1 湯匙他他粉，食用色素

做法：將前面5樣材料攪拌，用慢火煮，邊攪拌，最後變成一團拿起。攤暖後搓兩搓，分成數分，每分篤個窿加適量色素再搓均即可。

***每次玩完後，將泥膠放入密閉容器中儲存。如果佢變乾，可以加少少水再搓。

2.自製蚊怕水/膏

市面有d蚊怕水含有DEET，係一種有毒性嘅物質，比BB用得多唔好。至於出面買到嘅天然蚊怕水都係用香茅、艾草和茶樹等等嘅植物製成，其實我地自己整都得！又慳返舊錢！

蚊怕水：

材料：75%酒精200g+精油2g（薰衣草、香茅、尤加利、茶樹等）

做法：酒精加上精油充分混合之後，倒入噴霧瓶中即可。

蚊怕膏：（適合較細或對酒精敏感的BB）

材料：蜜蠟3g＋艾草3g＋初榨橄欖油30g＋可可脂2g

做法：將艾草浸於橄欖油中攪拌，隔水蒸燉15分鐘，隔渣過濾，取20g加入可可脂和蜜蠟攪拌，隔水用慢火煮溶，趁溫熱時倒入小瓶內，等30分鐘凝固即可。

3.自製副食品

出面買嘅副食品始終都唔及自己整嘅新鮮同平！！以下係幾樣靚叻媽以前成日整比仔仔食嘅副食品：

a.米糊

做法：將米洗淨後風乾，用攪拌機將米磨粉，每次用2湯匙米粉加10安士水煲，可按個人喜好落不同的配料（如瘦肉，菜蓉），煲成糊狀即可。放涼後可加奶溝稀。

b.南瓜泥

南瓜有豐富類胡蘿蔔素及B群，對BB發育有幫助！

做法：將南瓜連皮蒸熟，再以湯匙挖出，壓成泥。 

＊可加開水來調整濃稠度

4.布尿布代替紙尿片

其實有好多外國嘅BB都係用尿布，初時靚叻媽聽到用尿布好過尿片都唔信嫁，後尾上網做左好多功課就比佢打動了！！以下係我覺得尿布最大嘅好處！

a.慳錢$v$

一個B由出世到戒片咁計，約需用25條布尿布，如果紙尿片就要7000條到。

上網買布尿布一塊約70－200蚊，紙尿片一塊就$2.7到，咁計法用尿布足足慳成萬幾蚊！

b.防尿布疹

中大有教授話過紙尿片唔夠透氣同埋入面有好多化學成份，係引致尿布疹嘅元兇！但係用布尿布好乾爽唔會Up住BB個pat pat，想BB健康又舒服，我唔會比佢用紙尿片嫁！

（尿布疹真係好慘豬嫁，唔信你google下啦，我唔忍心po上黎）

c.環保

紙尿片要用500年先可以分解到！作為媽媽都想下一代有個好d嘅環境，所以靚叻媽都會減少製造固體廢物。

清潔方法：

先用水沖刷，加入梳打粉於有蓋的水桶裏浸，大約兩天用天然洗衣粉機洗一次即可。唔會有異味嫁其實！

5.自製/代製母乳皂

餵母乳本身就就可以慳返d奶粉同埋奶樽錢，如果有剩仲可以用黎整母乳皂！有媽媽話母乳皂可以用黎治療皮膚病！加上佢係純天然，比BB用都安心好多～

宜家出面有代製母乳皂，大約200蚊到，用150ml冰母乳可以整到400g母乳皂。出面仲有d母乳皂班，等媽媽學完可以返屋企DIY！咁就慳得更多！

6.清水/清潔棉代替濕紙巾

市面上有部分嬰兒濕紙巾被驗出有防腐劑，容易令BB過敏。一般黎講，媽媽可以用清水幫BB清潔，亦都有媽媽介紹我用清潔綿，市面上清潔棉大約$25包（120＋20塊），即係每塊$0.179，平過買濕紙巾！

7.自製BB揹帶

網上有好多教人自製BB揹帶嘅片，靚叻媽都學左幾款，但完全0成本嘅莫過於呢一款：

材料：2件舊T-Shirt＋1件孕婦托腹帶（或1件舊T-Shirt/大圍巾）

做法：

a.將2件舊T-Shirt沿著胸口位置打橫剪（圖示）

b.剪好後將2件舊T-Shirt交叉套於膊頭，再將孕婦托腹帶套於腰間

c.將BB雙腳套落舊T-Shirt的開口

d.再套上孕婦托腹帶

搞掂！

靚叻媽的話：

DIY係要花好多心機，但BB嘅成長同發展一錯過左就冇啦！想比最好嘅野BB一定要花心機同時間，無論幾辛苦都要抽時間！二黎搵代替品同DIY真係可以慳唔少嫁！（好有成功感呢）

參考資料：https://www.youtube.com/watch?v=bkkjWImwst0 截圖及網絡圖片