每一位媽媽最緊張既就係BB既飲食，其次就係睡眠質素。靚媽都唔例外，由靚B出世開始，靚媽已經幫靚B買左兩張床，多樣床上用品。買得多，自然變成“專家”，依家只要去BB用品店走一轉，就知什麼款式、什麼質料、什麼設計好用。今次講講5樣BB床上用品 ：

先黎一個summary，再慢慢話你知啦！

1. Cocoonababy 睡窩

Made in France，來自Red Castle 品牌既睡窩，合乎人體工學，令BB可以保持胎兒時既睡姿，有如置身於媽媽既子宮內一樣。

靚媽極力推薦，非常好用！靚B由出世回家開始到三個月大，都係瞓睡窩，靚媽覺得靚B瞓得好好，無試過有半夜扎醒既問題。雖然依個睡窩只可以瞓到最多四個月，但靚媽覺得好值得買，因為佢真係幫到BB最需要安全感既頭三個月。

2. First Year 45°枕頭

好多BB都有吐奶既問候，靚B亦唔例外，而有傾斜既枕頭真係可以幫手防吐奶。依款First Year 45°枕頭好方便，有埋固定腰墊，唔駛另外購買。不過，依款枕頭係無枕頭套，清潔方便就比較麻煩。而且，佢既45°傾斜枕頭，唔太配合個固定腰墊，BB一有郁動，就會向下跣，所以如果要使用依款枕頭，最好要有人陪同。

3.Gio 枕頭

好多媽媽追捧既韓國製枕頭，質料好又實用。有細、中、大碼，及不同花紋選擇。靚媽覺得依款枕頭容易清洗，亦容易吹乾。有時放係室溫，唔駛數小時就乾透，清洗方便。

靚媽覺得依隻牌子既枕頭緊貼BB頸部，而且十分透氣，特別適合靚B咁怕熱既BB。靚媽自己試過，將枕頭放係鼻既位置，原來真係焗住自己都唔會透唔到氣。

不過，對於反瞓既BB，夜晚最好避免放係床上放置，以保安全。

4. Red Castle 腰部固定墊

市面上有好多腰部固定墊售賣，唔好以為隻隻都一樣。其實除左質料舒唔舒服外，最重要就係睇佢調較闊度既地方，會否因為重疊而變得過厚。靚B之前用過一款腰部固定墊，因重疊位置太厚，令腰部墊高，增加吐奶機會。

靚媽都買過唔同既牌子，暫時覺得依隻牌子既腰部固定墊非常好用，質料好薄，無令靚B腰部托高既問題，而且純棉質料，十分柔軟。

5. Airwrap Mesh 圍床

靚媽雖然好貪靚，但每一樣買俾靚B既野，都係以安全為考慮之先。

大家選擇床圍千萬唔好只選擇款式，仲要睇埋佢係咪安全。大部分市面上買既床圍，都係用挷繩既方法，令床圍繫緊於圍欄上。但如果繩結一旦鬆脫，就會十分危險。過去外國有好多報道，都勸籲父母唔好為初生BB床設床圍。

其實床圍既作用係預防BB郁動時，身體撞到圍欄而受傷。對於初生BB黎講，床圍基本上係無作用。所以，靚B係出世後3個月一直都無用床圍。直至，靚B開始想翻身，靚媽就選擇左一款十分安全既款式。

依款Airwrap 床圍，唔係用繩結方法繫於床欄。於圖上可見，佢既長度設計，可以每兩至三欄杆圍上床圍，床圍尾端則有三整條魔術貼作固定之用，即使靚媽要將床圍拆下，都要花上一些時間。而且，質料透氣，係十分耐用而安全既床上產品。

最後我仲有用張Combelle床單！下層有防水墊，變左就慳番唔洗鋪多一塊防水床單，一張床單搞掂哂！而佢有防水功能之餘，都保持到透氣！不過由於靚B太叻冇賴尿，所以就未講到個成效俾大家聽喇！

希望以上既分享，可以幫到大家選擇BB床上用品啦。

TestingMama Blogger：靚媽湊B記

靚媽對育兒產品一絲不苟。從產品成份到研究數據都精益求精，不盲從廣告或坊間流言，只求以獨立眼光嚴選最優質產品予靚B。深信寶寶能在安全無害的環境中健康快樂地成長，是每個媽媽的目標。