【Blogger分享】新手媽媽經驗談 挑選Carseat 10大招！（超詳盡心得分享）
好多國家都立左例，BB坐車一定要用Carseat，雖然係香港暫時未立法，不過要知道手抱BB坐車係十分十分危險既事，有研究指出BB冇用Carseat既傷亡率比有用Carseat高出八倍，所以如果BB要坐私家車，Carseat是必須的！
市面上既Carseat真係好多，可以分為3個級別，分別係俾初生嬰兒、幼童及小童。有d初生Carseat可以用到18個月，有d可用到4歲。靚媽既Target係用到4歲既Carseat。選擇Carseat，安全一定放首位，其次就係舒適度。因為涉及安全問題，靚爸同靚媽今次真係超認真咁選擇，上網買左消委會<<選擇>>睇返前幾年做過既Carseat測試，再上網睇埋外國既Crash Tests 報告同Youtube，爬文睇用家意見，就鎖定左幾個牌子，包括Cybex同Recaro，之後就帶靚b去試。
靚媽買左咁多樣bb產品，覺得選擇Carseat係最大挑戰，甚至覺得自己變得吹毛求疵，要安全得黎，都要靚B肯自己坐。做左足足三日既搜尋，對汽車一竅不通既靚媽，終於明白Carseat係唔可以亂揀，因為有d Carseat過唔到Crash Test真係好恐怖！以下係幾日Research後覺得揀Carseat最重要既十個事項：
（1）ADAC、歐盟I-size、Stiftung Warentest 認證
a. ADAC：歐洲最大既汽車協會，亦係Carseat認證既權威。（ADAC 2016年評分表）
b. I-size：以往既歐盟認證叫ECE R44/04，但近年既新標準叫I-size，唔單止有前撞測試，仲有埋以往無做既側撞測試。
c. Stiftung Warentest: 德國獨立產品評鑑機構，德國最主要的消費者安全組織，除左安全性，仲會focus on 操作性、舒適度同質料有害物既檢測。
～消委會係2015年<<選擇>>公布左幾款品牌不同型號carseat係保護功能上及有害物質測試結果。大家可以係消委會網站用$12購買。不過，因為已經係2015年既事，好多新型號都未包括係依個測試當中，但係大家可以參考邊個品牌overall比較可靠。
後記：靚媽買既Carseat係ADAC同Stiftung Warentest 獲評為very good，及已獲I size認證既。大家揀carseat可以參考以上機構既評級啦。
2. ISOFIX 及支撐腳
如果你既車有ISOFIX固定接口，就最好買返可以配合ISOFIX既Carseat。有別於舊式用安全帶扣住carseat，ISOFIX固定接駁口可以令carseat更穩固，有埋支撐腳就更穩陣。
3. 360°轉
好多測試都建議4歲以下BB使用既Carseat要向後安裝。可以360度轉既Carseat方便上落時將Carseat轉向側門，再轉回後向。
4. 安全顯示裝置
就算揀到個安全嘅Carseat，安裝得唔好就等於無用。有d Carseat係轉向、扣安全帶、支撐腳安裝好並於水平線後，安全顯示裝置都會由“紅”轉“綠”，咁媽媽就會知道係咪安裝得好。（Recaro 同Cybex 都有咁既功能）
5. 五點式安全帶
依個唔駛多講，對4歲以下嬰兒黎講，如果Carseat無五點式安全帶就唔好買。
6. 可以調校到高度及傾斜度既坐墊
係I-size 既標準黎睇，Carseat唔應該只係睇BB既重量，仲要睇BB既高度、體型同年齡。所以有得調節既Carseat先可以fit 到BB不同階段既需要。
7. Foldable Wings
依家d 新既Carseat 左右都會有個foldable wings，行車時打開，如果有咩碰撞，係可以有緩衝既作用。依個function可能就係能夠滿足最新歐盟I-size側撞測試既原因，所以有foldable wings 都好重要。
8. Newborn 保護坐墊
有d stage 1嘅Carseat可以用到4歲，所以就附上初生坐墊，到BB可以坐直既時候，就唔駛再用張初生墊，可以坐到4歲了。
9. 帶BB去試坐
用家感受最重要，如果買左BB唔肯坐就大鑊了，所以買之前都係俾BB試坐下就最好。靚B試坐過3款，只有靚媽買個款係坐到笑。
10. 品牌重要，但型號更重要。
靚爸有兩隻心水，最後都係揀左Recaro Zero 1。對汽車有研究既靚爸話，要揀就梗係揀專出賽車椅既品牌啦，有時揀唔到就揀信心。不過，揀品牌既同時，一定要揀型號，因為同一牌子，不同型號都有參差。靚媽亦見過同一品牌有其中一款型號係消委會評分好高，但另一型號竟然唔合格，所以買之前要做足功課喔！
希望各位頭痛緊揀咩Carseat俾BB既你，靚媽既分享可以幫到你地啦。
銷售地點：荷花
TestingMama Blogger：靚媽湊B記
靚媽對育兒產品一絲不苟。從產品成份到研究數據都精益求精，不盲從廣告或坊間流言，只求以獨立眼光嚴選最優質產品予靚B。深信寶寶能在安全無害的環境中健康快樂地成長，是每個媽媽的目標。
