唔好以為幫BB剪指甲好容易，其實真係好大Project同大有學問咖！而係咁多款BB指甲鉗中，聲稱自己係安全既指甲鉗真係通街都係，但用落就完全係另一回事，剪得太入、剪到肉等等情況十分常見（當然都同媽媽手勢有關啦），但係剪在兒心，痛在母心呀，所以揀好用既指甲鉗一D都唔能夠馬虎。

以下幾款指甲鉗/指甲剪都經由 testingmama 三位媽媽親身用過、試過，是頗為推薦的指甲鉗 / 指甲剪，JM們可以參考一下。

1. Combi 指甲剪

阿G媽喜歡用BB剪刀，唔係整勞作果D，係剪指甲專用既BB剪刀。呢款勝在個剪刀頭係圓邊，唔會咁易吉到BB。

同埋勝在刀面夠薄，容易攝入去指甲邊邊剪，而且幾好控制！暫時touch wood未試過剪損，最好係襯BB訓左覺先好剪。

2. tommee tippee 指甲鉗

Lynette 媽就喜歡用指甲鉗，無他既，因為自己對手一緊張就變柏金遜，只能夠選用指甲鉗。

個人推薦用 tommee tippee 呢隻BB指甲鉗，因為幾好渣手，Lynette 媽對手好唔定都剪到，而且剪後指甲邊緣好平滑，轉彎位亦相當好剪，清脆一聲就剪到BB指甲。而且價錢好平，$16有交易。

3. Pigeon 指甲鉗

而這款 Pigeon 的指甲鉗有埋保護蓋 (可是阿G媽用過幾次後就唔見左個蓋了)，適合剪較大BB的指甲 (1歲up)，阿G媽幫阿女剪過都相當易剪，而且剪出黎指甲較整齊，而且剪後的指甲會自動彈入指甲鉗內儲存(完全符合日本愛乾淨的國情)。但注意此款式個人認為不適合小B用，因為刀口較難攝入小B的指甲。made in japan，盛惠$43。