準媽咪入院前都要執定個走佬袋，衛生巾可以話係必帶既！因為生完BB之後會有大量嘅惡露，呢個情況仲會持續四至六個星期左右先完全消失。咁產婦用既衛生巾同一般嘅有咩分別呢？簡單黎講就係長啲、闊啲同冇護翼。款式上都有啲唔同架：主要分為「連扣裝」同埋「自動黏貼裝」。

究竟揀邊隻好啲？有啲人又話一定唔用扣，因為著左成個相撲手咁；又有人話用扣好啲因為方便姑娘做checking 。大部分既醫院都有個走佬袋清單既，上面都會講明要產婦帶指定款式既衛生巾，所以記得睇清楚醫院既要求喇！

其實連扣裝同埋自動黏貼裝喺功能上都一樣嘅，最緊要都係吸力強,唔會漏！所以Testingmama就揀咗市面上幾款產婦衛生巾啦包括Kotex 、六甲村、Tenson同埋佩儷，同大家測試同比較吓！

「連扣裝」VS「自動黏貼裝」

喺測試之前同大家睇下兩款衛生巾先嘅分別先啦！ 

自動黏貼裝其實同一般衛生巾既用法一樣，通常都會配合網褲一齊用嘅，直接將衛生巾貼喺網褲上面就ok喇！一般黎講呢，黏貼裝配合網褲既話會貼身啲，衛生巾唔會咁易移位，所以都冇咁易擦到傷口。

扣裝就麻煩少少喇，要先將包裝入面嘅扣綁喺衛生巾既兩邊先 （有啲牌子嘅衛生巾已經連埋扣，唔洗自己綁落去）

再綁落腰間既吊帶度使用，用扣既衛生巾就唔洗配網褲用。

測試報告

測試一：吸濕力

測試方法：喺每塊衛生巾既中心點度擠兩支六毫升既液體，睇下邊隻衛生巾既吸水速度最快，同埋睇下佢地吸水既情況

測試結果：四隻產品既吸水速度望落都差唔多，但係可以睇到Kotex同Tenson都吸得比較集中，而擠落六甲村同佩儷既液體就跟住衛生巾上面既紋擴散。

測試二：回滲程度

測試方法：等衛生巾吸濕五分鐘之後，放張紙巾喺有液體嗰面，再加上重力，睇下紙巾會唔會沾上衛生巾嘅液體

測試結果：Kotex明顯有回滲，但量都唔算多，六甲村同佩儷就冇回滲，Tenson就有好少好少既回滲，少到鏡頭都唔係好影到

測試三：質感

測試方法：除左對黃手套,用我對玉手Feel下

測試結果：Kotex摸落好柔軟同厚身，六甲村就比較薄同鞋手，佩麗摸落質地同六甲村好似，但就厚啲同長啲，Tenson都係較為厚但都幾柔軟

衛生巾規格

(長度同闊度以棉芯為準)

希望大家睇完呢個測試對產婦衛生巾了解多咗，準媽咪執走佬袋嘅時候可以參考吓啦！