每一次文章開頭，幾乎都係今天的我打到昨天的我。因為生B前後，對人對物既價值觀唔同哂。曾經好決絕咁話「我一定唔會淘寶買BB野架！」，現實是現實，BB出世後，倒水式銷費。BB產品除左講質素，平民如我都係要睇價錢。多啲聽信得過既朋友介紹，或者憑經驗或仔細閱讀用家評價、商店評分，係淘寶都可以用開心價買到高質素既野。

忠告：淘還淘，老母都有原則既。用係初生BB身上 (紗巾、襪仔)、放落口 (奶咀、奶樽、牙膠)或者容易帶危險性既用品 (玩具泥膠) 呢啲我就唔會淘！

等我分享下呢兩年多，淘過最好最多心心仲要係好好用既寶貝啦～親～

1.【單肩寶寶背帶】

滿月後，老母常偷偷帶阿姐出街，但係隻手長期抱住2、3個月大既BB，肌肉酸痛之餘，又危險。出街比人撞親個B點算？但係又未足月份用HIP SEAT 型既孭帶。某啲牌子孭帶係有得改為打橫孭既，但我無買嘛。所以係淘寶揀左款單肩孭帶，將BB緊緊抱係胸前，老母兩手FREE返出黎做其他野，閒時輕輕抱住BB，有著旁人無法明白的親密！ 窩落去瞓，BB安睡好似好訓過自己張床咁！

背面有雙重扣，確保唔會孭孭下斷帶………………..啋！

再大個少少就可以半坐既方式孭住，不過去到BB 3、4個月大時，阿媽個膊頭應該頂唔順，因為真係重架喇。到呢個時候，可能要轉返Hip Seat 款，單肩背帶都只係一個協助過渡既用品。對於老母日日需要帶住阿B 往返屋企同麻麻家，單肩帶真係救咗我隻手免傷啊！

價錢：¥55 – 75
個人使用好感：★★★★☆
讚：係屋企都可以咁樣孭住BB訓覺，雙手仲可以噤電話
彈：如果要放初生BB落肩帶內，係會雞手鴨腳，因為好驚整到佢。BB去到三四月個時，重量令到媽媽背部好痛。不能長時間用。
關鍵字：單肩帶、嬰兒背帶、純綿嬰兒背帶

2.【抵到爛餐桌椅】

因為阿姐平日係去麻麻度，所以基本上用品我地都要準備兩sets，下下買正貨，真係好吃力。麻麻個邊用緊日本牌子highchair，但我地自己屋企都要買一張喎‌！係百貨公司睇啲cheap cheap 牌子，張凳好似唔係好穩陣都要 $800 幾？膽粗粗上淘寶搵… 你估我唔驚架？安全問題呀…好似搵個女條命教飛咁～真係要特別鳴謝淘精朋友為我揀呢款出黎！！！睇用家評價，都係讚好而且有用家試用圖，比較安心。當時價錢都係$295人仔，連運貨到香港，港紙400蚊有找。 (事後見到歐洲P牌都係咁上下款，價錢….唔好諗喇!)

鋼管材料感覺穩陣，賣家話可承受20kg，阿姐半歲用到兩歲半，依然穩固。最鐘意係支防滑柱，唔怕BB扭計個陣跣落黎。椅套可以洗、可以換。用到咁上下成個換左佢，不過唔係成日有貨……ER….

簡單講：四腳轉動、快速摺合、5個高度調節、連餐盤架、3點式安全帶
淨重：7.3kg
折合尺寸：35x54x85cm
打開尺寸：54×76.5x101cm

價錢：¥318
個人使用好感：★★★★★
讚：咁既價錢買到一個咁穩陣既Highchair，仲可以用兩年都未有異樣。要講3次好抵、好抵、好抵！
彈：實在係太好用，如果格硬要講有咩唔好，就係佢凳既牛津布料好易污糟，同埋有啲焗。
關鍵字：可折疊、餐桌椅、寶寶餐椅、JUSTIN佳田、多檔調節、四輪移動

3.【嬰兒餐椅帶】

這稱之為「瘋人綁」之餐椅帶，都係一個過渡物品。 5個月以上，半歲未滿呢階段好尷尬，出街食飯比佢自己一個坐BB高凳又危險，人仔太細隨時跣落地。但係佢地手多多，郁身郁勢唔肯乖乖坐係雙親大脾，開始加固，獨立位置坐就最好。所以淘左一個方便攜帶既餐椅帶。去到任何餐廳，只要有椅背既凳，基本上都可以套用到 (除非椅背設計獨特) 簡單幾個步驟，啪幾個扣就可以將「瘋小孩」綁起，大人就可以安心食飯喇！

使用完畢可以摺埋成一個小包包，放係行軍咁巨既媽媽背囊絕對無問題。 (好似有啲購買谷有團購，但價錢呢…就呢….自行決定啦)

價錢：¥40 – 50
個人使用好感：★★★★☆
讚：絕對係外出食飯既好幫手！比阿媽兩手fing fing 10分鐘快速食飯，那怕是短時間，都是一個享受。
彈：出街又要帶多一樣野，為充實既奶粉袋加添多一樣物品，又再脹多啲喇！
關鍵字：兒童餐桌椅帶、可擕式寶寶餐椅套、布坐袋、幼兒吃飯坐墊套

4.【實木遊戲圍欄】

這款豬欄都算係5星之選！

本身老母唔係好鐘意韓國牌個類膠欄，好似水馬咁圍住間屋做乜呢？仲要係好！貴！呀！更加唔會淘膠欄啦，怕塑化劑或者令BB吸入唔知咩塑膠氣味。見到淘精朋友本身都有用緊呢隻木欄，細睇簡介，尺寸合乎安全標準，包括欄杆距離5.9cm，欄高71cm，比一般標準為高。好似幾好喎！每片木欄都有連接器鎖定，確保木欄唔會係使用期間突然摺合發生意外。擺放唔一定要係四方形，可以按屋企大細，選擇唔同塊數既Package或唔同角度擺放。

用上大圓形厚身木為底座，附送3M防滑貼，木欄非常穩固。除非受狂烈撞擊啦，如果只係一般嬰兒「狂野搖晃」，木欄都係不為所動架。

將小朋友隔絕，任由家中寵物在欄外觀賞欄內生活。實係美事！

選擇無漆木，收件拆箱時無難聞氣味。安裝… 老老實實，唔算方便。因為一個唔為意安裝接合器唔岩位的話，又要拆過哂重頭砌過。雖然係有啲重，但一個女人仔，係絕對可以砌到，唔需要等人地老豆得閒先做。

價錢：¥300 – 800 (按選擇欄數而定，未連運費)
個人使用好感：★★★★1/2
讚：簡約美觀。價錢中等價，太平又驚，太貴又買唔起。實木質地滑手無刺，非常安全。
彈：底盤用3M貼痴住地下好穩陣，相對難移動要花力氣去轉位。拆卸改動需時間及耐性。
關鍵字：圍欄、嬰兒爬行護欄、實木圍欄、可折疊、悠悠龍

TestingMama Blogger：老母是這樣練成的

由主子出世一刻，少婦瞬間變成老母。湊B、泵奶、餵奶、加固、口味配搭，甚至所有關於BB用品，每日學習內容充實無比。汗與淚、力與脂肪成就世上千千萬萬的偉大老母。歡迎進入湊B世界。