每當身邊有朋友成為準媽媽，通常都會問老母同一個問題：「你用咩牌子蒸奶樽機?」
蒸奶樽機基本上係初為人父母既貼身戰友，分分鐘每日都要同佢有1至2次交流。
BB →食奶→奶樽 →清潔消毒→方便使用
所以準爸媽都好緊張，周圍問人邊個牌子最好，減少中伏機會。

老母當然都中過伏啦…!
當初以為唔係揀Nuk就係揀TT架啦，初頭朋友比個Nuk機我（只蒸無烘乾功能），立即點頭接手。
BB未出世，用嚟洗樽、蒸樽實係無問題架。
到阿姐真係返左屋企，實戰開始，就知瀨野…

每日要洗+蒸奶樽/ 泵奶配件N次，蒸完濕既，正路就應該放入乾淨既密實袋，再放入雪櫃。到要用時先至用熱水沖沖，再開奶….
不過BB每日食8至9次奶，雪櫃門不停開開閂閂又開開閂閂，都驚整壞雪櫃架…
樽入面既水係高溫蒸過既倒汗水理應乾淨，但感覺不良好。特別係泵奶既用具，蒸完濕濕的，再放上嚟泵，媽媽奶同倒汗水混和…………………過唔到自己心理關口Sorly!

頂左大半個月，最後自己買左Ulmuka 蒸烘機。蒸完、烘乾，然後放入乾淨既儲物箱，實係比濕the the 既感覺更良好。

Ulmuka蒸烘機界面操作容易，只係㩒兩下，就可以選擇蒸+烘乾或者分別只係蒸/烘乾。
發光顯示屏，睇到溫度同時間。基本上，蒸10分鐘，烘30分鐘，大約40分鐘就會完成整個過程。

蒸鍋可以放到8個寬口樽，放完樽放埋其他配件野，大堆頭都得。(當然佢自己本身都有個透窿蒸架放配件啦，不過老母懶得用啫!)
同之前Nuk蒸鍋只放到5個寬口樽比較，差得遠，成本效益直接提升。

價錢係貴D，平極都係要$788。不過我地差唔多日日用 (或者依家隔日用囉) 都用左一年半有多喇，係值返哂既。

大大話話用左咁耐，都有少少建議….

就係佢加水個個位喇。

說明書指示用跟機既量杯裝100ml水，加入發熱盤內。之但係如果我真係倒100ml，係會太滿，又怕整到個隔風葉，同埋會蒸蒸下底部漏水…
多次測試，最好都係落85至90ml水。

至於清潔方面，唔知係咪有烘乾既功能，水份蒸乾後，水入面既物質容易殘留積聚，好似有”結石”既物體。
最好一星期清理一次。

閒時可以用梳打粉，加水，用蒸既功能蒸熱後，浸一個鐘，再用毛布抹乾。

咁我都知，阿媽日理萬機，又要返工又要照顧一屋大細，無時間一星期清一次，但啲漬又真係好頑固，可用清潔熱水壺既檸檬酸 (用少少少少既份量)，放入已加水既發熱盤攪勻，蒸熱，放涼後用毛巾抹走污漬。安全起見，清潔蒸鍋及底部後，再用清水蒸多次，以防檸檬酸殘留。

乾淨哂!

今次係首次用大家分享，希望啱洗做到參考啦~

TestingMama Blogger：老母是這樣練成的

由主子出世一刻，少婦瞬間變成老母。湊B、泵奶、餵奶、加固、口味配搭，甚至所有關於BB用品，每日學習內容充實無比。汗與淚、力與脂肪成就世上千千萬萬的偉大老母。歡迎進入湊B世界。