BB到左4個幾5個月直至12個月，由於牙仔在牙肉內準備要出來，往往都會為小B們帶來不同程度的不適，如牙肉紅腫、痕癢和疼痛等，困擾寶寶的同時，也令一眾爸媽們非常「肉赤」。其實只要細心留意，便發覺BB會係呢個階段經常磨牙、經常哭鬧，係呢個咁重要既moment，一個好的牙膠，必然是幫助BB渡過「牙」關的恩物！

最好的日本牌子牙膠 – Combi 第三階段牙膠

上方為一片四葉草狀的牙膠，每片葉子都有不同的凸凹位俾BB咬同磨牙，兩邊設計得好似杯子手柄，聲稱可以幫BB過渡至訓導雙手持杯喝水的功用，下方設計有如沙槌玩具般會發出「沙沙」聲，並適合8個月以上BB用。

設計諗得相當周到，幾十蚊有得咬、有得聽、仲有得訓練埋渣水杯！

可以成舊牙膠用奶樽清潔液洗完後拎去蒸煮殺菌都無問題！

仲有埋個盒裝住，方便又衛生。

阿仔最愛的珠珠部份，佢成日都會好專心咁搖D珠珠，跟住聽到D聲就係度笑騎騎

另外，呢款Combi牙膠亦打造得相當堅固，無論點樣用蠻力拉扯都唔爛，十分抵用又抵讚！

最差的日本牌子牙膠 – Pigeon 經典兩色雙片牙膠

由一片紅色士多啤梨狀、一片綠色提子狀的牙膠，以及一個白色圈圈組成的牙膠配件，聲稱可以緩解牙痛和磨牙需要，鍛煉BB小手靈活性和眼睛辨識顏色的能力，並適合6個月以上BB用。

形狀幾得意，而且蒸得、洗得！

可惜，對只有5、6個月大既BB黎講，根本就好難掌握呢隻牙膠，姐係好難渣手呀 ⋯⋯最慘既係，白色圈圈並非牙膠位，阿仔果時又細個，唔識得拎又唔識得分辨，經常錯咬左白色部份，真係會痛到喊架！

除此之外，Pigeon呢隻牙膠仲十分易爛！用少少力一拉就爛左 ⋯⋯

總而言之，無論買邊款牙膠都好，記住一定唔可以買Pigeon呢款呀！緊記緊記！