太太圍埋一齊唔係講奶奶同小朋友就係講老公！之前網上有段爆紅短片叫「我的1000分老公」，講個老公返到屋企就做家務湊女，好多阿媽Friend share出黎話呢d男人絕晒種！又有人順便晒命話自己有個好老公。阿G媽成日同d媽咪friend吹水，收埋收埋唔少Case，忍唔住要同大家分享下！究竟天底下嘅好老公會係點，而無用老公又有幾咁令人火大呢？！

1. 不體貼老公 vs 體貼老公

無用老公絕對唔會主動幫手做家務！就算你忙到攰到就死佢都唔會出手！分分鐘老婆病左都仲要做家務….

至於絕世好老公就超貼心，知道老婆辛苦會叫佢休息下，主動幫手做家務！
   

2. 懶理婆媳問題老公 vs 促進婆媳關係老公

婆媳問題似乎係千古不變99.9999%會發生！老公係最關鍵嘅中間人！

無用老公唔理就真係冇得搞嫁啦～老婆又嬲，阿媽又嬲，雙輸！

絕世好老公一定會氹到兩邊都開心，老婆奶奶關係好，生活都開心d！

3. 愈幫愈忙老公 vs 幫得手老公

無用老公間唔中抽起條筋要幫手，點知搞到一獲泡！

絕世好老公煮飯、湊仔，做家務樣樣得！老婆放心交比佢之餘仲有得抖下～

4. 膽小老公 vs 勇敢老公

無用老公見到曱甴個陣就係咁⇊⇊⇊

最後咪只好老婆自己面對～

絕世好老公就算自己都驚，都會去KO小強！

5. 污糟老公 vs 乾淨老公

有d老公淨係識整亂間屋！次次幫佢執完轉個頭又亂返，晒氣！

至於絕世好老公呢～乾淨企理，執到間屋整整齊齊！

6. 照顧小孩方面：極度隨便老公  vs 有條有理老公

極度隨便老公自己份人本身隨便，所以湊小朋友個陣都一樣，真係唔放心比佢單獨湊B呀～

絕世好老公會同媽媽一齊學湊B，做起上黎有板有眼！

7. 唯我獨尊老公 vs 識得感恩老公

呢Type無用老公對老婆煮嘅飯嫌三嫌四，咁勁你自己煮啦！

無論老婆煮d野幾難食，絕世好老公都會食晒，仲會講句辛苦老婆喇～

8. 育兒方面：做晒好人老公 vs 做醜人老公

呢Type無用老公放工返到屋企就淨係同小朋友玩！唔肯做醜人，有時仲會幫住仔女！

絕世好老公肯做醜人，見到小朋友有唔岩會自己教，唔會推晒比阿媽！

9. 唔上心老公 vs 上心老公

唔上心老公連結婚紀念日都唔記得，講過要做d咩又唔記得，應承左又唔記得！（放棄）

絕世好老公每個重要日子都會留比老婆，諗埋點慶祝～仲會留意老婆既喜好同記住老婆講過既野～

10. 無視型老公 vs 重視型老公

無視型老公一返到屋企就打機，專心到火燭都唔會知！

絕世好老公每日都會花時間同老婆傾計／一齊做d野，咁先可以KEEP住咁甜～

戴頭盔時間：其實無論個老公有幾多野做得唔好，都有值得老婆愛既地方～同埋呢個世界唔淨只有無用老公，仲有無用老婆嫁，互相遷就到就得啦！

相片來源：網絡