GB Pockit BB車真人實測！【平價摺車系列】

近排見到好多人推住呢架堪稱全球摺得最細嘅BB車 “Pockit” 聽到個名咁勁，所以我特登訂咗部番黎同大家測試下！

出去試車之前，等我度下佢既Size同磅下有幾重先啦！

為左畀大家有個idea部車摺埋之後有幾細，我要出動我既黃手套喇～摺埋之後只得四隻黃手套咁大渣！

好！出發去試車嚕！

今日我地就黎到BB車勝地沙田市公園試車，試車緊係要搵專業嘅！所以我就請左我嘅好姊妹呀Wing同我地試車！

女車神呀Wing有一仔一囡，佢有5年推BB車經驗，平時一得閒就會同老公研究BB車，可以話係專業用家，推遍天下無敵車呀！

首先試下開車，阿Wing就話其實個Step唔難，都易上手，不過就要用手幫一幫先開到～

跟住就試下收車，呢架車出左名摺得好細，但其實佢係有兩種摺法嘅，分別係「方便型」同埋「極細型」，就等呀Wing試下有咩分別啦！

好明顯「方便型」摺得冇咁細，但係就方便好多，一Fing就開到，而「極細型」就要先收起個碌，不過真係細得好誇張呀！

首先我地會將BB車收到最細，然後試下放入環保袋，再將BB車放喺私家車

摺埋之後真係好細，見到呀Wing放入環保袋咩上膊頭都好輕鬆，仲唔洗放入車尾箱，放喺坐位之間都得，又真係幾方便喎！阿Wing話香港地咁細，架BB車摺埋同小朋友書包差唔多Size真係好方便收藏，上落車同搭飛機都一樣好方便！

呀Wing會推住BB上落斜同埋試下推過D凹凸不平嘅地面，之後會再試埋個Brake

阿Wing話可能架車比較輕，所以推行個陣會有少少搖晃，而Lock車嘅時候好似唔係好順咁，Daddy研究完之後就話係因為車碌鎖住剎車制嘅位置比較疏，初初用要就下位先踩到

睇落呢架車個籃唔係特別大，未必放到成個媽媽袋，不過佢嘅手柄位可以直接掛袋，唔洗另外再加個鈎上去

阿Wing就話最鐘意Pockit嘅安全帶上有個護頸位，Hold住BB個頭，就算冇得平瞓都起碼唔會令到BB個頭左搖右擺，抵讚！加上摺埋後真係超級細，方便攜帶收藏，去旅行用真係一流～配埋呢個價錢，真係值得推薦比大家咁話！

希望呢個測試幫到大家啦，今日真係好多謝呀Wing，仔仔卓嵐同呀Wing老公幫我地試車，為左表達我地嘅謝意，送埋部車俾你地啦～bye-bye！

GB Pockit 第3代 BB車

適用年齡：6個月以上-17公斤
開啟後尺寸：約長35 X 闊45 X 高102厘米
摺合後尺寸：約長18 X 闊36 X 高35厘米
重量：約5 kg
參考售價：約＄1988

＊榮獲2014健力士世界紀錄大全最小巧的嬰兒車獎項