BB喺6個月到2歲都好易發燒，所以如果係38度以下，唔少媽媽都會用退熱貼幫BB降溫，不過唔試唔知，原來揀退熱貼都有好多學問，有d有好勁薄荷味，有d就太凍，有d就黏力麻麻，一齊睇下testingmama嘅測試學下點揀喇

BB發燒應唔應該食退燒藥？

有外國研究提醒大家發燒本身唔會傷害小朋友，因為發燒可以令身體製造更多白血球去打仗，避免感染。醫生建議如果小朋友發燒喺38℃以下盡量用物理方法降溫，例如用暖水或酒精擦拭四肢、胸部、額頭、頸部等大血管處，或者貼退熱貼，同埋飲多d水。BB發燒38.5℃以上就要及時就醫，以免病情惡化！

媽媽可以參考研究建議BB應該幾時食退燒藥，不過如果有疑問最好都係問返醫生喇！

1. 小林退熱貼嬰兒貼

特點：盒上說明不含香料、色素、樟腦，嬰兒或皮膚敏感人士可放心使用

適用年齡：0-2歲

時效：4小時

用途：發燒

尺寸：40mm x 90mm

參考價錢：$43.8/12貼，$3.65/貼

購買地點：Mannings、Wastons等

2. Watsons 退熱貼

特點：盒上說明不含香料及人工色素，通過皮膚測試

適用年齡：0-3歲

時效：8小時

用途：發燒，頭痛，牙痛，消暑，難以入睡適用

尺寸：40mm x 85mm

參考價錢：$19.9/6貼，$3.32/貼

購買地點：Watsons

3. Pigeon退熱貼

特點：盒上說明無色素無香料，弱酸性

適用年齡：0個月以上

時效：8小時

用途：發燒、頭痛、牙齒痛、海水浴或戶外運動過度受太陽照射後適用

尺寸：45mm x 80mm

參考價錢：$54/12貼，$4.5/貼

購買地點：Online shop

4. 日本MUHI麵包超人退熱貼

特點：盒上說明弱酸性（其他日文唔識睇）

適用年齡：6個月或以上

時效：8小時

用途：適合發燒或大量運動的兒童使用

尺寸：110mm x 50mm

參考價錢：$48/16貼，$3/貼

購買地點：卓悅

測試報告

表面溫度

有時一mit開張退熱貼太凍驚BB會唔舒服，一貼落去就喊，宜家就測試下一mit開4款退熱貼嘅表面溫度係幾多喇！

結果：4款退熱貼一mit開嘅表面溫度介乎22.7度至23.5度，當中最凍嘅係麵包超人牌，而最高溫度嘅係小林。

降溫測試

用退熱貼當然係想可以幫BB降到溫冇咁辛苦，但如果張退熱貼根本降唔到溫，或許降溫效果太勁都唔係好事，宜家就測試下呢4款退熱貼嘅降溫效果啦！

測試方法：首先度下兩隻手嘅體溫，係介乎34至36度，然後貼上四款退熱貼，擺2個鐘再睇下邊個最降溫！

結果：降溫最多嘅係小林，總共降咗2.9度，而降溫最少嘅係Pigeon，降咗0.1度。

舒適度

貼咗2個鐘之後Pigeon同麵包超人牌都仲有涼浸浸感覺，不過唔算太舒服，而小林同屈臣氏個邊就冇咩感覺。

mit咗之後，testingmama皮膚上竟然出現敏感紅印！當中麵包超人個邊仲有痕痕地嘅感覺，得小林個邊冇事，媽媽比小朋友用之前都記住要自己試用下先！

香味

唔聞唔知，原來市面上有d退熱貼係有薄荷成分，媽媽係揀個陣都要留意！

今日測試嘅Pigeon同麵包超人退熱貼聞落都有薄荷味，而Pigeon聞落比較濃，其餘兩款就冇味。

黏度

有時BB扭計唔肯用退熱貼，mit嚟mit去就已經冇晒黏力，宜家我用返頭先貼咗兩個鐘嘅退熱貼，試下邊個仲keep到黏力！結果小林同麵包超人仲keep到，而屈臣氏同Pigeon已經唔太黏。