早排Testing Mama係Facebook share咗條切菜神器短片迴響超大，有成269萬人睇過！片中望落用切菜神器切得好快，切大舊細舊切絲切粒批皮都得！今次搵到入廚經驗10年嘅Cooking Mama嚟挑戰呢個切菜神器，一個用刀，一個用神器，睇下邊個切得又快又靚！

【第一回合】蘋果

成品：Cooking Mama切出嚟嘅蘋果明顯比較靚仔，而切菜神器切到啲皮爛爛地

時間：Cooking Mama快過切菜神器7秒！

賽後報告：用切菜神器切蘋果比較麻煩，因為切口直徑比較細，要先將蘋果切到細過個直徑先得，如果太大就會好似片中咁kick kick地，切到啲皮爛晒！（直徑約7cm）

【第二回合】冬菇

成品：切菜神器切得比刀靚，冇咁多碎碎甩出嚟

時間：Cooking Mama切得快過切菜神器少少

賽後報告：切菜神器切冬菇＝乾脆利落！

【第三回合】豆腐

成品：兩邊成品差唔多，都幾好！

時間：切菜神器切得快過Cooking Mama 2秒！

賽後報告：切菜神器切豆腐粒都算快靚正，但要將豆腐切成片先

【第四回合】蕃茄

成品：Cooking Mama切得靚仔d，而切菜神器會有少少汁切咗出嚟

時間：切菜神器快1秒

賽後報告：用切菜神器切蕃茄係得嘅！不過Size好重要，都係個句，直徑大過Cutter都係唔得

【第五回合】青瓜

成品：兩邊切出嚟嘅形狀唔同，厚度都唔同，睇媽媽prefer邊種喇～

時間：Cooking Mama快7秒

賽後報告：用切菜神器切會剩低少少切唔到（怕切到手）

【第六回合】紅蘿蔔

成品：兩邊切出嚟嘅形狀都係唔同，睇媽媽prefer邊種喇～

時間：Cooking Mama快16秒

賽後報告：刨絲器已經唔係新鮮野，用後成品比較薄，岩晒整春卷呀同埋都係會剩低少少刨唔到（怕切到手）

比賽結果

總結

Cooking Mama以4:2勝出！

雖然切菜神器輸咗，但佢嘅好處係唔怕切到手，岩晒新手用！用嚟整沙律都好正，將所有材料切落個盒到再Mix，仲有埋保鮮蓋，原盒上都得～

有咩想我地測試嘅話，歡迎留言！