大家好又係我Testingmama啊！講起「雞」你諗起咩啊？當然係「補」啦！

唔少大肚或者生完B嘅媽媽都會燉雞汁或者飲滴雞精補下身。

到底兩樣嘢其實有咩分別呢？今日就等我⋯⋯請嚟資深陪月偷偷師啦！

有請傳說中嘅陪月Kitty ee！

Kitty：Hello Testingmama！今日有咩幫到你呀？

Testingmama：想請問吓飲燉雞汁或者滴雞精對身體有咩好處呢？

Kitty：雞汁或者滴雞精可以益氣養血，健脾補虛，幫到產後媽媽上奶同快啲恢復元氣！

Testingmama：咁根據你咁多年嘅陪月經驗，而家啲產後媽媽多數會揀傳統燉雞汁啊，定係滴雞精呢？

Kitty：以往都係要我哋燉雞汁多，不過而家好多太太都傾向買現成滴雞精，加熱就飲得方便啲！

我今日除咗要問多啲燉雞汁同滴雞精嘅分別，我仲準備咗王朝滴雞精、白蘭氏萃雞精、余仁生滴雞精、御藥堂極上養生滴雞精同少爺滴雞精，同Kitty ee一齊幫大家Check真啲！

第一關：品牌歷史

阿媽教落，買嘢第一樣要睇嘅就係牌子，歷史悠久就有保證啲咁話！

睇返佢哋嘅官網資料，白蘭氏同余仁生都有成過百年歷史，御藥堂就後生啲，而王朝同少爺就冇顯示到係幾時成立嘅～

Kitty：我都係咁話，白蘭氏啦、余仁生同御藥堂都出名！

第二關：雞源

Testingmama買嘢又點會淨係睇歷史咁簡單呢！滴雞精，用咩雞當然重要啦！

常見會用嚟整滴雞精嘅一般都係老母雞同土雞。

老母雞即係生蛋嘅母雞，一般會用籠養，參考返台灣營養師嘅講法，老母雞年紀比較大，脂肪量較多，萃取出嚟嘅蛋白質同氨基酸濃度較低。

而土雞一般會走地飼養，跑得多又後生啲，肌肉多而脂肪少，蛋白質同膠原蛋白都豐富。

而台灣比較出名嘅就係紅羽土雞同黑羽土雞。

睇返，除咗王朝係用老母雞，其他4隻都係用土雞。

當中白蘭氏同少爺分別都有標明用Omega 3、葉酸，同益生菌做飼料，強化雞隻嘅健康！

第三關：製作過程

雞就揀完啦！講咗咁耐，其實平時啲燉雞汁係點煮㗎？

Kitty：呢樣嘢等我嚟講啦！首先準備一個燉盅，將一個碗仔倒轉放喺底。

Kitty：然後將新鮮雞去皮斬件放喺碗上面燉3個鐘。

Testingmama：聽落都幾麻煩喎，作為懶媽代表，我真係冇咁好耐性啊！睇睇5款滴雞精係點煮先！

王朝、余仁生、御藥堂、少爺都係用無蒸氣回流技術，多數都要蒸成6-10個鐘，而白蘭氏就係用高壓密封雙層鍋，透過循環蒸氣滲透食材核心。

教大家睇多一樣嘢啦～今次5款都係滴雞精名產地台灣製造，不過淨係得白蘭氏有寫明廠址係台灣彰化嘅自家工廠，自己工廠製造親自把關又再加少少分啦～而王朝同御藥堂都有喺官網介紹工廠係用先進同機械化過程生產，都俾你哋過關啦！

第四關：營養成分

終於嚟到重頭戲啦！究竟就咁食雞肉、燉雞汁同飲滴雞精有咩營養上嘅分別呢？

簡單講解吓食雞補身嘅原理先！雞肉本身含有豐富蛋白質，可以促進生長發育同埋修補身體組織，但就要經過腸胃消化變成小分子嘅氨基酸先吸收到。

對於身體虛弱或者消化能力比較差嘅人嚟講就冇咁容易吸收到營養。

而燉雞汁同滴雞精呢，都係透過加熱原隻雞而成嘅精華，雞肉當中嘅蛋白質經過加熱會變成小分子氨基酸，身體容易吸收，仲可以提升免疫力𠻹！

4.1 蛋白質

Testingmama：既然蛋白質咁重要，我哋就睇吓佢哋嘅蛋白質含量啦！Kitty ee 交個場俾你！

Kitty：睇過先！睇標籤呢就係王朝同少爺最高，每100g就有8g或以上蛋白質。平時我自己燉雞汁就唔知有幾多蛋白質啦。

睇完標籤就等我循例用蛋白試紙試埋啦。

將試紙放入滴雞精，越深色代表蛋白質越高。王朝、白蘭氏同少爺都好深色喎！唔錯唔錯！

4.2 無添加

等我再Check埋佢哋係咪「三無」先！登登！全部都係無添加激素、防腐劑同色素！抵讚呀！

4.3 脂肪、膽固醇

生B前後嘅媽媽一定好著緊身形，唔想食咁肥膩但又想補到身。

Testingmama：唔知燉雞汁同滴雞精嘅脂肪係咪差唔多呢？

Kitty：唔係㗎！燉雞汁通常會比較油膩，有圖有真相！而滴雞精就會隔走油脂，多數都標榜零脂肪、零膽固醇，唔會對媽媽健康造成負擔

Testingmama：係喎！今次5隻都係冇脂肪同膽固醇！唔怕肥啦！

第五關：味道

Testingmama：咁唔知Kitty ee對滴雞精嘅味道有咩要求？

Kitty：要鮮甜冇腥味、易入囗、仲要唔肥膩！

Testingmama：咁呢個部分交俾你品評吓啦！

Kitty：色澤嚟講，王朝、余仁生、御藥堂、少爺都係偏深色，似茶色咁。

白蘭氏就比較似燉雞湯色，金黃啲

Kitty：飲落口感最濃郁就係白蘭氏，有啲像平時飲花膠湯黏黏地嘅口感，御藥堂同少爺都比較濃，而王朝就稀少少。

味道嚟講，王朝、余仁生、御藥堂、少爺都有啲腥味同苦味，少爺會多返啲鮮味，而白蘭氏就最濃燉雞湯味，仲越飲越好飲。

不過口味嘅嘢都係好主觀，各位媽媽買之前都可以試飲咗先決定！

第六關：加熱及保存

Testingmama：頭先你提過燉雞汁都幾麻煩，其實要搞幾耐呢？

Kitty：係㗎，燉雞汁連埋買材料同準備要3至4個鐘，而呢啲滴雞精簡單加熱就飲得，而且又可保存耐啲，真係好方便。

睇返呢5隻全部可以室溫保存，多數隔水或者微波加熱都OK！保存期就1至2年啦。

基本資料

精打細算嘅Testingmama緊係要計吓價錢啦！

Testingmama：啊～燉個雞汁要幾多錢？

Kitty：如果買無激素嘉美雞就大約要$250隻，每隻雞淨係燉到一小碗雞汁，價錢嚟講包裝滴雞精抵飲好多，大約$50零蚊就買到一包。

總結表

今日真係多謝晒Kitty ee解答咗我咁多問題呀！最後畀返總結表大家睇啦！

最後提提大家，雞汁或滴雞精本身含有鉀質同鈉質，患有痛風、高血壓、腎病嘅媽媽食之前最好問返醫生意見！

同埋要留意入面有冇添加藥材，未必人人啱飲！希望呢條片幫所有大肚同產後媽媽搞清楚燉雞汁或滴雞精嘅分別啦！拍咗咁耐，我要去補一補身先啦，下條片再見啦～Bye！

#購買情報
王朝：https://bit.ly/3ldRNXJ
白蘭氏：https://bit.ly/32fmPGd
余仁生：https://bit.ly/2FPZ8wB
御藥堂：https://bit.ly/2Em3ZFc
少爺：https://bit.ly/31izPeS