(31.8.2015更新)

祖迪媽係支持全母乳嘅媽媽，但奈何香港嘅環境令到想餵母乳嘅媽媽想好難撐落去，特別係在職媽媽。我好多朋友都要匿埋係公司廁所到泵奶，其中有個老闆又周不時比說話佢聽，最後頂唔順唯有搵過份工！今日祖迪媽要為一眾支持母乳餵哺嘅媽媽發聲，我地只係想比最好嘅野BB！

7個香港母乳媽媽的控訴：

1.產假短

上面show左各地區嘅產假時間，香港真係少得可憐，睇下瑞典同瑞士，父母合共有成16個月咖！不過據我所知好多國家嘅產假薪金都會有政府補助，但係香港就要僱主負責。

2.男士侍產假短

新手媽媽一個人湊初生BB真係拿手唔成勢，如果冇奶奶同工人幫手更加唔知點算，如果有老公幫手同陪住一定會好好多！但係好不幸香港嘅男士侍產假只係得3日…

3.在職媽媽夜間餵母乳睡眠不足

其實又要兜返去產假短，在職媽媽產後個半月(前4後6)就要開工，而初生BB 2至3個鐘要食一餐，起身餵夜奶真係頂唔緊，之前有個台灣媽咪餵餵下訓著左壓死個BB，真係好令人擔心！

3.公共哺乳設施不足

香港到宜家都未就公共哺乳設施立法，而台灣就一早已經立左法，規定商場一定要有哺乳室，空間仲要有一定嘅比例。香港有d大商場嘅育嬰室只得一格，仲要冇無獨立哺乳間，有時排隊都隊到炆！

4.公司缺乏支援

香港一般嘅公司都唔會有獨立房間比媽媽泵奶，好睇個同事同老闆肯唔肯體諒，比個會議室/休息室媽媽用同埋比放d奶係雪櫃，萬一老闆或許同事唔體諒，真係好委屈咖！好似台灣就有法例保障在職媽媽，每日有兩次合共一個鐘嘅有薪時間泵奶，或者比屋企人帶BB到公司餵奶，而老闆一定要配合！

5.專業援助不足

祖迪媽嘅朋友有講過有d醫院嘅姑娘對母乳唔係好了解，新手媽媽都唔知應該問邊個好，所以希望政府再培訓醫護人員正確嘅母乳知識。仲有母乳媽媽試過係職場受歧視，但係向平機會投訴並唔受理！

6.社會認知不足

香港人對母乳餵哺認知不足，甚至會歧視！有媽媽試過係餐廳戴左餵奶巾餵奶，但係就比人用奇異目光望住，唔通要BB係廁所到開餐？

⇊⇊呢段片正正係講出香港母乳媽媽嘅情況！

講到尾，祖迪媽都係想大家比多d Support母乳媽媽！同埋政府做多d野啦！唔該！

相片來源：網絡