自家製最健康 十招教你揀麵包機！
現代Mama追求健康生活，盡量都唔想比一家大細食太多食品添加劑落肚，所以係能力允許嘅情況下，所有擺入口嘅野都想自己整。近期靚叻媽身邊啲Friend都想買返部麵包機自製麵包，但市面上咁多款點揀好呢？靚叻媽就做下功課同大家分享下！
1. 酵母位＋配料位
有部分麵包機會有獨立醇母位同配料位，一早放入去，佢會自動係最合適嘅時間投落去同麵包一齊焗，咁媽媽就可以一勞永逸，唔洗再睇時間去落野。（部分模式需要中途自行落料）
2. 預設時間
識揀麵包機一定要揀有預設時間嘅！臨瞓前放定所有材料入去，Set定時間，到時到候佢就會自己開機，等你係麵包香中瞓醒！
3. 麵包烘焗顏色／程度
大部分麵包機都有烘焗顏色選擇，例如淺色、普通、深色等，不過各款麵包機可以揀嘅程度不一。
4. 麵包程式數目
唔同麵包機有唔同數目嘅程式可選，除咗有常見嘅幾款麵包外，有啲仲可以整到麵條、蛋糕同麻糬等等。
5. 自動保溫功能
大部分麵包機都有自動保溫功能，大約可保溫60分鐘。
6. 攪拌力／速度
麵包機嘅攪拌力同佢製作時間好有關係，唔同麵包機焗製嘅速度好懸殊，製作同一款麵包可以差成兩個鐘咁多！
7. 溫度控制
麵粉發酵得好唔好係麵包好冇味嘅關鍵，如果麵包機馬達線圈溫升太高，麵粉會吸收咗馬達嘅熱力，導致發酵太快令味道變酸。
8. 攪拌槳防黏設計
攪拌槳防黏設計做得唔好，麵包整好後會黏住攪拌槳，一黎影響外觀，二黎清洗麻煩咗。
9. 機身隔熱
有啲質素較差嘅麵包機機身表面會熱，家長要留意返唔好比小朋友掂到。
10. 攪拌聲響
有部分麵包機攪拌時都會發出聲響，媽媽們最好擺遠啲睡房，唔好比佢嘈住小朋友瞓教。
消委會測試報告
消委會去年測試咗市面10款麵包機，除咗溫度升幅、絕緣距離等安全表現，亦測試咗麵包質素、速度、耗電量、方便度等效能表現。如果媽媽們想了解更多，可以參考 消委會測試報告。
（轉自蘋果日報）
