Hello大家好又係我Testingmama！新手媽媽啱啱生完B真係好多嘢都唔識，沖涼啊、換片啊、連洗奶樽都有學問！

之前我哋收到媽媽嘅DM，話想睇奶樽洗潔液嘅測試！有求必應嘅Testingmama係時候出手啦！

今日同大家測試嘅分別係：Chu Chu奶瓶蔬果洗潔液、BABYGANICS 奶樽洗潔液、Baby Swipe奶瓶及蔬果濃縮洗劑、NUK奶瓶清潔液、Pigeon奶瓶蔬果清潔液同Arau Baby嬰兒奶瓶清潔泡泡。

第一關：除奶味測試

平日又要湊B、又要泵奶、仲要煮飯俾老公食…邊有咁多時間即時洗返用完嘅奶樽啊！有時擺到夜晚一次過洗，啲奶味洗極都仲有！

就等我測試下佢哋除唔除到奶味先！

測試方法好簡單，就係喺奶樽分別倒入200ml奶，擺一個鐘後過一過水，再用六款奶樽清潔液洗

洗完之後BABYGANICS、Baby Swipe同Arau都係無奶味嘅！

NUK就有少少奶味，而Chu Chu同Pigeon都仲有明顯奶味，可能要洗多幾次先得啦～

提提大家～用完嘅奶樽最好盡快洗，如果真係洗唔到，個樽至少都過一過沖走啲奶先！因為奶係好容易滋生細菌，擺太耐好易儲埋一堆細菌，到時就要花更多時間去消毒清潔㗎喇！

第二關：清潔度測試

洗奶樽除咗浸味，洗唔洗得走啲油脂都好緊要，洗完摸上手，仲油油地就一定fail啦！

測試嘅方法係將六條紗巾沾滿茄汁之後放一晚。

再放落加咗奶樽洗潔液嘅水入面清洗！睇下邊個洗得最乾淨先！

可以見到NUK洗得最乾淨！而Pigeon同Arau都仲有深色嘅漬〜

不過〜今次嘅測試係為咗方便大家睇到清洗效果先用隔夜茄汁！佢哋唔係專門用嚟洗漬，所以媽媽們可以當參考一下啦〜〜〜

第三關：泡量

有啲媽媽就鍾意多泡，覺得會洗得乾淨啲，有啲就鍾意少泡，貪快啲沖得走。

計我話…清潔力夠先係最緊要，同埋一定要沖乾淨啲泡先收工！之前上網睇過有媽媽投訴工人姐姐洗得唔乾淨，結果一倒水入奶樽就起晒泡，真係嚇死人啊！

我哋用返建議嘅分量加水，睇下泡量先！

可以見到，最多泡嘅係BABYGANICS，Baby Swipe同NUK都有少少泡，而Chu Chu、Pigeon同Arau都無咩泡嘅！

第四關：保濕度

唔少媽媽都反眏有啲奶樽清潔液洗完隻手會又嚡又乾，就快洗到有主婦手！咁點得㗎！

所以Testingmama決定親自出手！幫大家試下洗完之後隻手嘅保濕度！

結果保濕度最高嘅係Baby Swipe，洗完仲上升咗1.8%水分！Chu Chu 、BABYGANICS同Arau保濕度都唔錯！而NUK同Pigeon洗完之後嘅保濕度無變〜

第五關：成分

Testingmama提醒媽媽們！喺揀奶樽洗潔液時，避免揀用含有「硫酸類Sulfuric acid」同「亞硫酸類sulfite」等刺激性強嘅成分。

另外，好多清潔劑會加入金屬螯合劑(Chelation)、安定劑(Stabilizers)、防腐劑(preservative)、香料等合成添加物！

雖然話對人體無明顯危害，但畢竟BB無我哋咁強壯！建議各位家長在選購時最好避免上述成分啦！

Chu Chu、BABYGANICS、Arau都有添加物！而Baby Swipe、Pigeon都無列明成份，NUK就無添加物～

第六關：香味

有部分奶樽清潔液都會強調係無香料、無添加之類〜咁聞落又會係咩味呢？等Testingmama形容一下啦！

Chu Chu 無咩味，BABYGANICS同Baby Swipe 就有番梘味，NUK聞落有啲酸！Pigeon就甜甜地，Arau就有少少膠味嘅

同場加映：清洗奶樽奶嘴小教室！

首先準備清潔液、奶樽、奶樽刷同盆。喺盆入面加水，倒入適量清潔液。

用清水沖洗奶樽。

將刷放入奶樽，清洗時打圈，往上轉。

然後再刷樽口邊同樽外面。

再刷埋奶嘴外框，奶嘴心就用手輔助搓洗。

最後徹底沖水至冇泡沫，晾乾就Ok。

另外Chu Chu、Baby Swipe同Pigeon仲可以用嚟洗蔬果！用法好簡單，只要將清潔液加入水，清洗完蔬果之後，再用清水洗返乾淨就ok㗎啦！

基本資料

俾返啲基本資料同總結表大家先。

希望今日嘅測試幫到咁多位媽媽揀奶樽洗潔液！大家有咩想我哋測試嘅，都歡迎喺下面留言同我講㗎！我哋下條片再見！byebye！

#購買資訊
Chu Chu: https://bit.ly/3cgYzrK
BABYGANICS: https://bit.ly/3j1thHK
Baby Swipe: https://bit.ly/2ZSF0kI
NUK: https://bit.ly/32Qp845
Pigeon: https://bit.ly/3mDD8pB
Arau: https://bit.ly/35Vadri