Johnson’s baby, 施巴, Mustela, 阿B哥－BB沖涼液點揀好？
阿G媽個大B岩岩出世無耐就皮膚敏感起粒粒
，後尾換左沖涼液就冇事！我先發現原來好多人用左冇事嘅沖涼液都唔代表岩阿B用！所以話沖涼液都係人夾人！不過成分同特點都可以睇左先，過濾下先再決定買邊隻！為免媽咪們晒錢買咁多返屋企試，阿G媽就揀左d熱門牌子沖涼液開黎試喇！
揀沖涼液小Tips：
1. 二合一免沖水
2. 保濕
因為BB皮膚嘅脂質層非常薄，水分蒸發得快，好容易出現乾燥、發紅、痕癢、甚至濕疹及敏感性皮膚問題。所以用嘅沐浴露要夠保濕，洗完唔會太乾。
3. 少泡
一黎多泡泡會怕佢落左化學野，二黎多泡怕洗到好乾。
4.不含化學成分
例如鹼性、人造色素、香料、石油副產品、化學防腐劑及化學起泡劑等等… 以免引起皮膚敏感。如果聞落太香我都唔太prefer，怕落左人造香料。
5. 完整成分列表
如果佢連成分列表都冇比你，都唔知佢落左d咩！
外觀＆味道（按圖放大）
除左Mustela係乳白色，其餘都係透明。
阿B哥同施巴聞落都似Johnson’s baby黃色個枝洗頭水味，前者味道較淡。而Mustela同Johnson’s baby聞落都好香。（唔識形容，但覺得係香料味）
泡量測試
沖涼液入面起清潔同起泡作用嘅係表面活性劑，但出面多數都係落化學合成表面活性劑，例如大家都聽過嘅SLS，皮膚刺激性強，受二噁烷污染的機會大，所以都唔會揀咁多泡嘅比BB用！
結果（按圖放大）
Johnson’s baby 同施巴較多泡、阿B哥同Mustela較少泡。
毒性檢視
阿G媽推薦大家上 EWG (Environmental Working Group) 的官網check成分/產品毒性。EWG是美國一個公益性的環保組織，產品成份安唔安全，媽媽都可以check到！網站會顯示毒性分數 0-10分，分數越高越毒，分數越低越安全！
check 化學成份安全度：https://www.ewg.org/skindeep/
1. 阿B哥Atopico 茶花油洗髮沐浴露
上網搵先知阿B哥係大島樁出品。標榜無色素、 無香料，性質溫和，絕不刺激皮膚。與人體皮脂主要成份相同，滋潤及保護肌膚。過水容易，能徹底清潔嬰兒肌膚。清爽，絕不會繃繃緊。特別適合嬰兒、 乾燥、 敏感或濕疹肌膚使用。日本各大醫院推薦使用。
用法：沐浴及洗髮，以清水過淨。
成分及毒性：樽身只得日文成分，阿G媽好努力翻譯先得到呢個表！
Cocamide DEA（椰子醯胺）係界面活性劑。國際癌症研究機構(IARC)將此成分列為2B類－有可能對人類致癌物。2012年6月，環境健康危害評估加州辦公室將此成分列為致癌物。
大家見到-paraben尾嘅成分就知道係防腐劑喇！
Propylparaben（對羥基苯甲酸丙酯）同
Methylparaben（對羥基苯甲酸甲酯 ）都係保存防腐劑，最常見嘅影響係過敏反應，Parabens 類成分安全性爭議一直不斷，文獻上有提到paraben可能同環境賀爾蒙及間接致癌性有關。
試後感：用黎洗手，洗完後覺得有點點乾。另外，一扭開個按樽頭就見到d沐浴露沾滿個頸位，打側就會漏出黎。
容量：400ml
價錢：$155，$0.39/ml 最貴！
產地：日本
購買地點：一田、樓上BB鋪
推薦度：
單單係有可能對人類致癌物
，我已經唔敢用，加上又有Paraben。只能說Made in Japan都唔一定OK。
2. Mustela 髮膚沐浴啫喱
標榜不含皂性。蘊含滋潤成份，補救硬水令皮膚乾燥和粗糙的影響，用後皮膚得到舒緩滋潤。配方非常溫和，不刺激眼睛。蘊含專利天然成份Avocado Perseose®（牛油果活源醣），有助增強皮膚屏障功能，並能保護嬰兒的皮膚細胞資源（幹細胞）。初生開始適合使用，包括從深切治療部出院的。
用法：
淋浴
先用溫水弄濕寶寶的身體皮膚和頭髮，泵出少許髮膚沐浴啫喱於手掌，搓勻成泡，清潔嬰孩身體及頭髮，然後用清水徹底過淨。
浸浴
倒適量髮膚沐浴啫喱於浴盆與水攪勻後，放寶寶於浴水清潔頭髮及身體，無需再過水。
成分及毒性：成分表係樽身側邊，好難搵
Parfum（香料）一般可分為動物性、植物性及人工合成。因為冇講明係用咩香料，所以毒性成分先咁高。
PeG-7 Glyceryl Cocoate （PEG-7 椰酸甘油）係界面活性劑。加入後會較為滑順，甚至有相當的起泡性。一般健康的皮膚對此濃度通常不會感到刺激，但當皮膚受傷、發炎、起疹、角質偏薄時，部份可溶化劑就可能會造成刺痛、發癢現象。
PEG-150 Distearate （PEG-150 二硬脂酸酯）係界面活性劑，添加過量易引起皮膚過敏，有引發面皰的可能，面皰發生性為 2/5。
試後感：洗完手都有點點乾，不過就好香～
容量：200ml
價錢：$99/2pcs，$0.25/ml
產地：France
購買地點：一田
推薦度：
已經有濕疹既BB就唔好用喇，冇皮膚問題既BB亦都唔好用過量！（其實阿G媽自己好鐘意呢浸香味，不過小朋友最好唔好用有香料既野）
3. 施巴 Sebamed 嬰兒潔膚浴露（倍滋潤配方）
標榜100% 無皂無鹼，滋潤潔膚。含角鯊烯及尿囊素，滋潤保濕、改善乾燥。含pH5.5配方，促進嬰幼兒弱酸性保護膜形成。含不澀眼睛配方。免沖水。適合初生嬰兒、幼童或乾燥敏感肌膚。
用法：適合淋浴(花灑浴)或浸浴。如浸浴，浴後無需過水，用浴巾抹乾即可。嬰幼兒、兒童均可使用。
成分及毒性：樽身或盒身都唔見成分表！！以下成分表係出自EWG官網測試，當參考一下。
Fragance 即係香料，因為佢冇講明係用咩香料，所以毒性成分先咁高。
Benzyl Alcohol （苯甲醇）高濃度、長時間可能造成的危害：有麻醉作用，對眼部、皮膚和呼吸系統有強烈的刺激作用，吞食、吸入或皮膚接觸均對身體有害。台灣建議用途及限制使用：用於製備花香油和藥物、某些油漆和塗料、彩色膠片顯色劑、環氧樹脂固化劑的溶劑和稀釋劑。
PeG-7 Glyceryl Cocoate（PEG-7椰酸甘油）係界面活性劑。加入後會較為滑順，甚至有相當的起泡性。一般健康的皮膚對此濃度通常不會感到刺激，但當皮膚受傷、發炎、起疹、角質偏薄時，部份可溶化劑就可能會造成刺痛、發癢現象。
試後感：洗完手都有點點乾
容量：400ml
價錢：$117.9，$0.29/ml
產地：Germany
購買地點：美康、watsons、一田
推薦度： 已經有濕疹既BB就唔好用喇，冇皮膚問題既BB亦都唔好用過量！
（因為樽身冇成分表，所以都唔能夠作準，只作參考）
4. Johnson’s baby 強生嬰兒洗髮沐浴露
標榜pH值中性、不含肥皂或酒精、溫和地清除脂溶性殘餘物，使用不刺激嬰兒眼睛的沐浴配方。
用法：加8-10滴於一盆清水中攪勻，沐浴後無須再沖洗，以毛巾抹淨即可。（阿G媽：8－10滴點計呀
）
成分及毒性：樽身冇列明成份！！阿G媽參考左外國裝嘅成分
Parfum（香料）一般可分為動物性、植物性及人工合成。因為冇講明係用咩香料，所以毒性成分先咁高。
PEG-80 sorbitan laurate（PEG-80失水山梨醇月桂酸酯）係界面活性劑。Cosmetic Ingredient Review Assessments 有強烈證據顯示此為對皮膚有害物或過敏物。
Phenoxyethanol（苯氧乙醇）係防腐劑，未稀釋前對眼睛刺激性很大，稀釋至2.2%則不具刺激性。
Cocamidopropyl Betaine（烷基醯胺甜菜鹼）係界面活性劑 。在低濃度情況下不會造成肌膚或黏膜的刺激。
試後感：洗手後，4隻入面得呢隻比較潤，洗完好香。
容量：500ml
價錢：$44.9，$0.09/ml 最平！
產地：Malaysia
購買地點：惠康、Aeon
推薦度： 平價之選，但有落香料。謹記唔可以用過量！
（因為樽身冇成分表，所以都唔能夠作準，只作參考）
消委會2010年嬰兒沐浴露及洗髮露測試結果
有害物質測試微生物測試（按圖放大）
今次試個3款都係5星
沖涼小Tips:
1. 沖涼水溫應約攝氏38度。
2. 如果是浸浴的話，5至8分鐘便足夠。
3. BB皮膚嘅水分較容易流失，沖完涼後要搽天然成分嘅嬰兒潤膚露，減低表面摩擦。
4. 用清水洗並唔能夠有效清除來自於排泄物所衍生的脂溶性殘餘物，反而間接破壞BB肌膚的保護層，而且重覆用水洗可能會令皮膚水分流失引致乾燥和紅腫。據歐洲臨床實驗發現＃，使用性質溫和嘅沐浴露可有效清潔 ，比只用清水更能改善皮膚保護功能。
5. 香港醫學會會董兼皮膚科專科醫生陳厚毅提醒家長勿購入大量沐浴產品，因產品通過置於浴室，其溫暖及潮濕環境，更加速產品內細菌繁殖。
