今次想同大家分享一下，係小豆細個到而家用過嘅水樽，因為我都買過好多水樽可以同大家分享。

1.Pigeon

我第一個買既水樽係Pigeon，呢個水樽得覺得超方便、好輕巧，咁佢既容量係有150。

佢既好處係佢既手柄可以摺埋，大家都知媽媽袋好重、好多野裝，如果佢可以摺埋又可以放多d其他野。同埋佢耐熱程度去到120度，放溫水或熱少少既水都ok。呢個係我地第一個買既水樽，佢都好願意去攞，可能因為好細個同好輕，佢就拎住自己周圍啜。但係佢唔好處就係佢d配件冇得去再買，用完之後要成個去換。

2.b box

另外一個係澳洲牌子b box，佢容量就有240ml，賣點就係唔會漏水出嚟，因為佢入面有個十字型飲管既口。

我諗唔同階段水樽都有呢個功能，佢就係防止d水滴出嚟，其實唔係太大動作都ok既。同埋佢裡面有個金屬波波，就係小朋友點飲都好，d水都會隨住金屬波波去轉，呢個就係佢賣點之一。

但係佢有個唔好處，佢嘅飲管拆左出嚟之後好難塞返入去。每次我要用好耐時間先塞到入去，所以呢個水樽其實唔係用左好多次，因為我覺得佢好難洗。

3.Munchkin

之後我又買左呢個水樽，佢成個都可以飲到。

而呢個水樽既賣點都係唔漏水，呢個牌子既水樽有醫生推介，因為d醫生報告講過，有飲管既水樽會令小朋友條脷擺放得唔自然，相反如果冇飲管既水杯，佢地就唔會阻礙到條脷既發展，同埋佢洗既時候超級方便，只得3樣零件，咁樣開左洗呢3樣野就ok喇～

所以呢個會洗得超方便，但係佢既唔好處就係冇個蓋吸住，如果有蓋吸住就會衛生同乾淨好多。另外小朋友飲既時候要用少少力啜先飲到，唔知係咪每個小朋友都識用呢個力度。

4. Thermos

第4個就係冬天用既保溫壺，呢個係膳魔師既保溫壺。佢好方便一啪就開，保溫程度亦十分好。我由早上大約10點裝暖水到晏晝3､4點，8､9個鐘都keep到個溫度，所以呢個係成個冬天都會用既保溫壺。另外佢裡面d配件都唔複雜，簡單拆開咁洗就ok。但係唔好處就係配件唔係咁易買到。

5. IKEA

呢2個就係我近期新買既呢個我覺得超好用，一個係IKEA度買既。因為佢係鴨咀既關係，我又想俾小朋友學用大人杯，而佢剝左鴨咀之後可以就咁揸住嚟飲。

6.Richell

最尾呢一個係日本好出名既牌子，用左2日覺得佢好方便。佢既容量有200既，同埋佢有個手柄，好多大型百貨公司都搵到佢既配件，所以呢個應該可以用好耐。

咁今次既分享就咁多喇～下次再見 Bye Bye！

==========================================================