相信好多潮媽都聽過Babyzen嘅Yoyo BB車，佢地最近出左個新model Yoyo+，Testing mama就特登班左部番黎同大家測試吓！今次仲好開心邀請到有五年推BB車經驗嘅好姊妹呀Wing同我地一齊試車！

呀Wing就話揀BB車嗰陣最重要嘅係要操作簡單，其次就係車身要輕，第三就係小朋友坐嘅時候嘅舒適度！睇下呢架BB車過唔過到佢個關先

【真人外景實測】五大測試

YOYO＋有分0+同6＋座位，0+就係For初生BB，6＋就係For 6個月以上BB用，而阿Wing囝囝已經8個月喇，所以用6+嚟測試就岩晒喇！

測試一：開收BB車

測試方法：呢架車出名係可以單手開同埋摺，所以我地就要呀Wing一手抱BB一手開同收車，睇下係咪真係得先！

打開BB車都算輕鬆，步驟只有兩個，解開個鎖之後一Fing就開到架車！

收車就有四個步驟：要先校低個太陽擋，跟住就按同拉開車底嘅解鎖掣，然後垂直抽起，再Lock返個鎖就搞掂！

測試結果：開收車阿Wing都可以一手抱住BB一手輕鬆完成，女車神真係女車神呀吓！完全Easy Job！

測試二：推行

測試方法：呀Wing會係凹凸地面 、 上、落斜路推架車，試下轉彎順唔順暢、避震程度同埋個Brake lock得實唔實！

香港D地面其實非常多凹凸位，阿Wing之前用嘅BB車車碌碌成日都會Kick住，好難推！而YOYO＋就非常好推，推凹凸位地面都唔會卡住個碌！

上落斜都好流暢，不過阿Wing就話一時未慣落斜速度變快咗至於避震方面都唔錯，比佢用緊個架好！

Brake嚟講阿Wing就話一腳踩落去就Lock到，唔洗踩兩邊Brake方便好多，又唔洗好似之前個D咁要就返車輪上嘅窿位先Lock到～

測試結果：推行方面阿Wing比4.5粒星，佢話媽媽推得好輕鬆，BB又舒服喎！

測試三：儲物空間

呢個升咗Lv 嘅Yoyo+ 聲稱多左60%嘅儲物空間，儲物空間睇落就比一般BB車嘅儲物籃大但就比較淺，除左下面個籃之外仲有個拉鍊袋可以放野，唔知呀Wing試過又覺得點呢？

測試結果：阿Wing話佢個儲物籃比較闊同淺，好容易就可以放入同拎出個媽媽袋！拉鍊袋就可以放D急需用嘅野，唔洗下下喺媽媽袋度摷所以俾5粒星呀～

測試四：坐椅調校

測試方法：呀Wing會試下放鬆同埋收緊座椅後面嘅扣索帶，睇下坐椅可以調校到咩角度先！

測試結果：YOYO＋要用扣索帶調校坐椅角度，阿Wing就話可以改善下，因為普遍出面個D可能拉一個鈎一拉落嚟就調校到，同埋坐椅冇得完全放平～

測試五：易攜程度

測試方法：首先我地會度下架車摺埋之後既大細，佢聲稱可以Hand Carry上機嫁；而重量我地就磅過大約係6.5kg，唔知阿Wing揹上身之後覺得點呢？

測試方法：之後就試下將架BB車放係車尾箱，睇下放左BB車之後車尾箱仲可以放到幾多野先！

測試結果：阿Wing就話唔算大重，如果輕多少少就最Perfect！而將架BB車摺起放落車尾箱後，仲有好多位可以擺Daddy嘅用品，佢話之前個架BB車要霸一個座位嫁

整體用後感

優點：
1. 可以單手開同埋收車，方便媽媽一個人帶BB出街
2. 喺凹凸地面都好好推，唔會Kick住
3. 摺後體積細，可以輕易拎上巴士
4. 儲物空間大，容易拎野同放野
5. 一腳踩落去個Brake度就Lock到

缺點：
1. 因為佢坐椅兩側冇護頭枕，所以阿Wing囝囝瞓嗰陣個頭會斜埋一邊，擔心佢會撞到頭，但相信如果Over一歲就會好好多～
2. 要用扣索帶調校坐椅角度
3. 坐椅冇得完全放平

產品資訊

參考售價：【Full Set 2016】 HKD 6100；【6+】HKD 4100

購買地點：mothercare、Bumps to Babes及Online Shop等