大家好，又係我Testingmama！知道好多新手媽媽都係睇住我哋嘅比併去揀BB產品，今日又係時候renew一下唔同大類別嘅產品比併，嚟個年度update！

初生BB每日飲7-8次奶、換8-10次片、瞓3-4次覺，新手媽媽真係少對磨打手都搞唔掂，尤其是換片抹Pat Pat最緊就要係快・狠・準，唔係阿B分分鐘請你飲茶，幾眼瞓都當堂醒晒！

唔少新手媽媽都想知，Poo Poo完用咩幫BB清潔好，除咗直接沖、用乾棉同熟水之外，濕紙巾都係一個好幫手，之不過一去到諗揀邊款呢，又開始頭痛啦！

Testingmama幫緊你，幫緊你！問勻身邊嘅媽媽谷，得出6款最多人推介會擺入走佬袋同埋俾初生BB用嘅牌子，即刻幫大家比一比！

分別係：Huggies天然加厚嬰兒濕紙巾、Johnson’s baby嬰兒護膚濕紙巾、順順兒頂級嬰兒濕紙巾、萬寧嬰兒無香濕巾、SoftTouch嬰兒純棉濕巾同BOSOMI嬰兒加護濕紙巾！

第一關：材質

新手媽媽第一大Concern係：邊款唔會抹損BB Pat Pat？事關初生BB皮膚好幼嫩，一個唔覺意用力少少，就怕會整紅整損佢哋！

要解構呢個問題，第一步就要睇濕紙巾嘅材質，而家最常見嘅就有水刺無紡布（即係不織布）、純棉、或者一啲天然纖維！即使係相同物料，用料同造工唔同都會令到摸上手嘅感覺唔同！

Huggies係用天然萃取纖維、順順兒係用天然人造絲、SoftTouch用100%純棉、而Bosomi 就咁寫柔軟纖維！另外兩款就冇寫到啦！

Testingmama摸上手嚟講，就係Huggies同SoftTouch最滑，順順兒都唔錯！

等我再放大啲俾大家睇啦～可以見到Huggies同SoftTouch嘅表面最平滑，冇乜凹凸不平嘅纖維同窿窿！同我摸上手嘅結果都好接近！

第二關：厚度

新手媽媽第二大Concern係：抹得乾唔乾淨！畢竟係抹Wee Wee同Poo Poo，無論母愛有幾澎湃，相信大家都唔會想Hi到成手Poo Poo掛！所以濕紙巾嘅厚度就好重要啦～有啲薄過紙嘅，大家就無謂做勇者啦！

等我度過先！最厚嘅係Huggies同順順兒，有成0.45mm，夠厚就唔驚抹到自己成手都係啦！而其他嘅就差唔多0.3mm左右！

第三關：清潔度

新一年嚟個Upgrade版！喺凹凸不平、波濤洶涌嘅賽道上，唔知邊款可以成功帶走最多咖哩汁呢？

Huggies同順順兒抹兩下已經清晒9成醬， 再抹埋少少罅位就搞掂！而Johnson’s baby、萬寧、Bosomi 就抹3下KO晒，都幾唔錯。Bosomi就要抹多幾下啦！

講到清潔，幫大家check多樣嘢啦！疫情下唔少媽媽都會留意埋濕紙巾嘅除菌能力，今次呢6隻入面Huggies就喺官網有寫Lab Test證實可以帶走99%細菌；Johnson’s baby都有寫到Lab Test顯示使用後，皮膚表層嘅細菌數量下降，而萬寧就有特別添加到天然抗菌白柳樹皮萃取精華。大家可以參考返啦！

清潔力夠就當然好啦，但太過強力會唔會刺激阿B皮膚㗎？如果濕紙巾中含有表面活性劑，雖然會有清潔功能，但都有機會刺激到BB皮膚！

第四關：溫和度

等Testingmama今日為大家呈獻一個新測試！呢啲粉叫做「玉米醇溶蛋白」，佢同我哋皮膚入面嘅角蛋白好相似，唔容易溶於水，但當佢同表面活性劑結合之後，就會好易溶解，所以用佢嚟測試濕紙巾水入面表面活性劑嘅刺激性就最適合不過啦！

首先將濕紙巾擠出水分，加入蒸餾水，攪勻佢，再加入玉米醇溶蛋白，攪拌30秒之後，等佢靜置5分鐘再過濾，睇下邊款嘅混合物最杰，即係溶得最少，對皮膚比較溫和！

可以睇到Huggies係溶得最少，仲Keep住好似糊仔咁杰，即係代表對皮膚嘅刺激性相對低！Johnson’s baby、順順兒同萬寧都唔錯，而Bosomi就溶得比較多啦。

第五關：含水量

下一個Test接住落！大家都知濕紙巾要夠濕先好抹啲！等我即刻磅一磅濕紙巾嘅重量，等佢風乾之後再磅就知原本含水量有幾多啦！

登登！每張含水量最高嘅係順順兒，有成7.67g，不過佢係最大張，多啲水都好正常！而呢Huggies都有5g以上水份，都好夠濕呀！

第六關：乾爽度

夏天最怕係咩呀？ 黐立立呀！濕紙巾抹完乾乾爽爽又唔會帶走皮膚水分就最Perfect！即刻試下邊款啱我心水！

將濕紙巾抹落手背之後等10秒就放上羽毛，用風扇一吹，吹走晒就代表好乾爽！ 咁多款上面嘅羽毛都吹走晒，得Johnson’s baby有少少羽毛停留！

我再擠埋啲濕紙巾水出嚟感受下啦，都係得佢會有起泡同滑潺潺咁，因為佢加咗Lotion，所以都好合理嘅！

不過都戴返個頭盔先，有啲媽媽鍾意抹完乾爽，但都有人鍾意滋潤度比較高，所以呢一part都係俾大家參考啦！

第七關：成分

揀濕紙巾成分要留意咩items呀？相信Testingmama Fans都應該識答啦！直接去表啦！

最後最後，睇埋一啲基本資料先！

六款Size用嚟抹pat pat都夠大，最大張係順順兒，而最細張係Bosomi。

包裝選擇方面呢～Huggies同SoftTouch都只係得大片數包裝，另外搵個濕紙巾袋或者密實袋裝出街用會好啲～而另外四隻都有細包裝可以買，雖然價錢冇咁抵，但拎出街就用比較方便！

唔少得對比埋價錢同產地！

最後為大家送上總結表！

希望今次又幫到大家揀濕紙巾啦～如果鍾意我哋嘅比併系列，記得share俾身邊嘅大肚同新手媽媽呀！Testingmama又要忙住下個測試啦，我哋下次再見，bye bye！

#購買資訊
Huggies: https://bit.ly/35aYB1q
Johnson’s baby: https://bit.ly/3iwvf5O
順順兒: https://bit.ly/3gmvr4H
萬寧: https://bit.ly/3v8vIhe
SoftTouch: https://bit.ly/3iwpPYr
BOSOMI: 759阿信屋