小朋友開始學爬學行後，就會通屋走，家長為咗防止意外，好多時都會安裝兒童安全門欄，但原來揀門欄都有好多學問，唔係分分鐘導致意外發生！消委會測試咗市面­上8款兒童安全門欄，一齊睇下結果如何！

【間隙測試：2款樣本欄柵間隙過大】

小朋友最鐘意捐窿捐罅，如果欄柵間隙過大，好容易攝到BB手仔腳仔！間隙測試將安全門欄調校至建議嘅最大寬度，再用測試探頭睇下過唔過到欄柵之間嘅間隙，探頭大約有5個月大BB Patpat咁大，結果有兩款可以通過到！

【縫隙測試：1款樣本或夾手指、腳趾】

測試發現，其中1款樣本嘅門欄底部同底框之間嘅縫隙，有機會夾傷小朋友嘅手指­或腳趾，唔符合歐洲標準要求。

【撞擊測試：合格】

小朋友又爬又撞，安全門欄又承唔承受到呢？經過撞擊測試後，8款安全門欄都合格。

【推拉測試：合格】

小朋友好鍾意搖欄，測試員用器材重覆1,000次推拉門欄。結果8款安全門欄都合格。

【耐用度測試：合格】

安全門欄平日會開開閂閂幾廿次，會唔會用得耐就鎖唔實呢？測試結果8款安全門欄開閂4000次後，仍然操作正常。

【自動式關閉­裝置測試：4款樣本不能自動關門同上鎖】

測試發現有4款樣本嘅自動式關閉­裝置，開咗門後，唔可以自動關門同上鎖，唔符合歐洲標準。

【注意】

測試發現其中1款樣本嘅壓力塞嘅膠料含有有機鍚化合物，總釋出量高於歐­洲玩具安全標準嘅最高限值規定，而被檢出嘅有機錫合化物主要為甲基錫，有研究發現甲基錫會影響幼鼠嘅學習能力，不過暫未有相關嘅人體研究數據。

兒童安全欄使用貼士
消委會提提大家，在使用兒童安全欄柵時需留意:
1. 切勿在安全欄旁邊放置凳子或箱子，以免幼童當作腳踏，攀越欄柵。
2. 不要以硬刷或百潔布刷洗欄柵，以免油漆脫落或鏽蝕。
3. 當幼兒達2歲或以上，或有能力攀越欄柵，家長應及時拆除欄柵。
4. 若安全欄底部設有欄框，應小心跨過，慎防絆倒。

《香港消費者委員會 Hong Kong Consumer Council： 兒童安全欄安全嗎？》

參考資料：4款兒童安全欄柵未符歐洲安全標準