大家好又係我Testingmama！問10個新手媽媽用咩幫BB抹Pat Pat＋面仔，有9個都答你乾棉＋熟水！點解咁多人用呢？之唔係因為乾棉天然無添加，又冇防腐劑，皮膚脆弱或者敏感嘅BB都用得！

乾棉多數都可以乾濕兩用，乾就可以當紗巾咁用，吸走水份。

而濕用就多數會沾熟水用，幫BB抹面、抹臍帶、換片抹Pat Pat都OK。媽媽產前產後生理清潔、或者當化妝棉用都得～

講完基本嘢入正題啦！今日揀咗4隻牌子嘅乾棉/乾巾嚟比較下，分別係思詩樂嬰兒專用抗菌清潔棉、SoftTouch嬰兒專用清潔棉、Huggies 天然加厚綿柔乾巾同NUK 嬰兒棉柔巾。

1. 片數及材質

逐款開嚟見我！思詩樂（140/180/1080片）係直接打開封口拎啲棉出嚟，冇得封返嘅。

而SoftTouch（150片）就有密封拉鏈袋。

Huggies就兩包為一袋（80片孖裝/20片），同 Nuk（80片）一樣都係抽取式包裝，可以逐張逐張抽出嚟用。

大家亦都可以拎晒出嚟用個盒裝住慢慢用。

材質方面，思詩樂、SoftTouch同Nuk都係棉質。

而Huggies新出呢款就係用天然植物纖維造嘅～

摸上手嘅話4款都好柔軟！

2. 尺寸

用嚟抹Pat Pat Size好緊要，太細就怕好難抹走poo poo，或者Hi到隻手～

拍埋一齊睇，Huggies就係最大張嘅，思詩樂同SoftTouch就細張啲，不過都夠用嘅！而思詩樂同SoftTouch都係屬於厚身嘅，Huggies同Nuk就係比較薄身。不過無論厚薄，只要密度夠，唔會滲過底就得啦！

陪月姨姨都教路，如果尺寸太大嘅話仲可以剪一半用，又可以慳返筆！

3. 清潔度

係時候實戰試下！就咁用乾棉加水，抹得乾唔乾淨？會唔會用好多張先抹完呢？
今次我就以3張濕棉做一個標準，試下抹唔抹得走晒啲咖喱漬先！

可以睇到Huggies已經抹乾淨晒～而Nuk只係爭少少就搞掂！另外兩隻抹多一兩下就應該OK啦！事實證明用乾棉加水都可以抹得好乾淨～

留意埋原來思詩樂有天然抗菌加工處理。

Huggies仲有寫喺做過測試可以抹走99%細菌，喺疫情用又安心啲！而呢4隻都係唔會滲過底嘅～

4. 棉絮

我諗大家用化妝棉都試過抹到成面毛毛啦，抹完面又要掃走啲碎碎，都好麻煩下！但BB仔嘅話，如果抹完面有棉絮殘留，都驚佢哋會吞咗入肚仔！

等我試過先！首先將2塊一齊濕水後，再輕輕撕開，睇下有沒有棉絮。暫時就係得SoftTouch表面已經有毛毛。

再向外拉一拉，可以見到思詩樂同SoftTouch都比較易撕出毛毛，而另外兩隻就冇。大家可以參考返啦～

5. 包裝說明

個個都話乾棉最Natural無添加，等我Check下佢哋包裝點講先！除咗全部都係無香料、無螢光劑之外，

有部分更係無著色、重金屬同甲醛！

6. 價錢

價錢方面都幫大家計埋數啦！思詩樂、SoftTouch同Huggies都係大概2毫子一張，而Nuk就3毫6一張。

靜靜雞話俾大家知，有時BB展一次過一大箱買仲抵啲㗎～

總結表

Recap返今日嘅資料同Test俾大家睇啦！

TestingMama小教室

新手媽媽埋嚟睇！乾棉加水好就好啦，但都要識得點幫BB抹！首先用個盒仔裝啲暖熟水，將所需要嘅乾棉浸一浸水，壓走多餘水分，分返開就用得啦！

幫BB囡抹就記得要由前至後，避免細菌感染到尿道！

抹到乾淨之後如果仲濕濕地，可以用啲乾棉印返乾，再按需要幫BB搽Lotion就搞掂啦！

如果出街想帶乾棉，都係帶個盒仔同暖水就得啦！

今日真係學到好多嘢～知道新手媽媽們都有好多嘢想問、想睇我哋測試！歡迎留言或者PM我哋，Testingmama盡量幫你！下次見啦，Bye Bye！

購買情報：

思詩樂: https://bit.ly/3IVpLeb
SoftTouch: https://bit.ly/3wOOZJ0
Huggies: https://bit.ly/3LOmfo7
Nuk: https://bit.ly/3wW5oLI