【空氣清新機睇真啲】Smartech、Medisana、Aurabeat -負離子、HEPA、聲波有咩分別?

【空氣清新機睇真啲】Smartech、Medisana、Aurabeat -負離子、HEPA、聲波有咩分別?


呢排武漢肺炎搞到大人細路都擔驚受怕,諗盡計仔去抗菌!好多媽子都想入手返部空氣清新機擺喺屋企用,殺下菌又可以清新下啲空氣。

今次Testingmama就搵嚟呢幾款空氣清新機,睇下佢哋有咩分別,同埋需要注意嘅嘢啦!

便攜式

拎出街用最緊要就係要夠細!呢部機仔細過我隻手掌,放落褲袋、衫袋都唔阻碇!仲有條掛繩添!佢個樣雖然四四方方,不過勝在夠硬淨,仲有個軟膠保護套𠻹!

細細部嘅空氣清新機出街用就啱晒!Smartech ion honey係用負離子殺菌,除味之餘仲可以淨化空氣中嘅氣態微粒(例如:甲苯)同埋固態微粒(例如:灰塵)。

拎出街用嚿電就一定要夠用。佢嘅強力淨化模式可以用到14個鐘,而極省電模式用一個星期都冇問題!佢可以插USB充電,用尿袋叉都OK!

室內用

微塵粒子係會隨住空氣飄嚟飄去㗎!小朋友日日留喺屋企,家居空氣清新當然係首要。而室內用嘅空氣清新機最重要就係個過濾功能,一齊睇睇呢幾部機係用咩濾芯啦!

Smartech ion air 係採用大家都好熟嘅HEPA濾網,可以過濾99%微塵同花粉,仲可以吸收甲醛、苯、VOCs、香煙等等有害氣體。除此之外,佢內置嘅負離子產生器可以產生超過每立方厘米100萬個負離子。

而Medisana AIR 採用嘅係3M 過濾網加上活性碳過濾層,可以抗菌及去除2.5µm以上嘅微粒,過濾塵、花粉同臭味。

睇埋AURABEAT AB S1,佢嘅過濾方式比較特別嘅,佢用咗銀離子空氣過濾器,聲稱用5分鐘就可以消滅99.9%以上嘅冠狀病毒!

另外佢仲有「聲波加強空氣過濾技術」專利,簡單嚟講即係令空氣入面嘅懸浮粒子隨住聲波嘅震動,加長粒子嘅行程,提升過濾效能。

睇完佢哋嗰過濾系統,咁覆蓋範圍又點樣呢?

Medisana 覆蓋範圍喺比較靈活,最大約適用於600呎嘅空間,無論屋企定Office都啱用!

如果喺600呎嘅空間就淨係可以每日淨化1次;用喺200呎嘅空間就可以每日淨化3次。

而Smartech同AURABEAT嘅適用範圍大概都係100呎左右,適合廳或者睡房,放喺Office枱面都夠用。

Testingmama最後提提大家,要保持空氣清新就要定期更換濾芯!

Smartech就建議約1年就要更換,而Aurabeat就建議3-6個月,當然都要視乎使用情況而定。至於Medisana 就非常之貼心,佢嘅底部有指示燈,變咗紅色即係要更換濾芯。

Smartech同Aurabeat更換都比較方便,個蓋容易打開。但Medisana對於我呢啲弱女子就比較難打開,要俾啲力水先開到,最好都係交返俾老公啦!

最後俾返個總結表大家參考下啦~

相信大家睇完都搞清楚佢哋嘅分別,買返部啱用嘅俾小朋友傍身個心都定啲啦!唔好怪我長氣呀,除咗要Keep住空氣清新,記得要洗手洗手洗手,消毒消毒消毒!係咁先,我要去排口罩啦,Bye。

產品詳情:http://bit.ly/31Kqxag