洗手、消毒、除菌近年已成為每個人嘅口頭禪！除咗我哋之前報導過嘅洗手液、搓手液測試，唔少人屋企都會用全家適用嘅除菌沐浴露，希望將出街一整日嘅細菌通通洗走，乾淨又舒服！但一諗到「除菌」，硬係會擔心洗完之後皮膚乾爭爭，更擔心引發全家皮膚繃緊或乾燥問題。Testingmama作為家庭把關者，一定要揀一款清潔度足夠，除菌又溫和嘅沐浴露！

今日出席呢場比併嘅有滴露經典松木沐浴露、Dove溫和除菌沐浴乳、威露士除菌去味沐浴露 (碌柚葉)、Lifebuoy全面保護沐浴露同埋Protex抗菌冰凉沐浴露。事不宜遲，即去試真啲先！

1. 顏色質感

首先我哋從外觀睇吓5款沐浴露嘅分別先！滴露同Lifebuoy分別係白色同粉紅色，兩款都比較稠。而Dove同Protex都係呈淺藍色半透明狀，只係Protex較稀，而Dove稠度較為適中。威露士就呈淺黃色半透明狀，稠度中等。

2. 保濕鎖水度

從外觀分析完，係時候了解吓佢哋嘅「內涵」啦！一於等我TestingMama親身出馬，試一試佢哋嘅保濕鎖水能力，睇吓會唔會一洗完就搞到皮膚乾爭爭先～

首先我將手臂內側劃分5個區，然後用清水微微沾濕手臂，再以適量沐浴露搓揉。之後就用清水沖洗30秒後擦乾，最後用水分檢測儀測試每區手臂水分度（即時，10分鐘後各一次）。

雖然洗完手後即時度量嘅時候，所有牌子都即時提升咗皮膚水分，但乾後十分鐘再度量，結果就截然不同啦！只有Dove繼續保持皮膚水分度，證明保濕鎖水能力較強！沖完涼皮膚都唔會好繃緊。而另外4款都有令皮膚嘅水分下降少許，但威露士嘅油分就冇改變到，都唔錯！如果皮膚乾嘅朋友仔，沖完涼記得搽下Body Lotion呀！

3. 溫和清潔度

可以清潔乾淨固之然緊要，但係日日都起碼沖一次涼，最怕會好傷皮膚！嚟嚟嚟，TestingMama上新架撐！

首先用燒瓶各自以50毫升清水稀釋10毫升沐浴乳。

用移液管將15毫升已稀釋嘅沐浴露水溶液唧入培養皿中，鋪上玉米醇溶蛋白試紙（剪成圓形），再喺表面滴上5毫升沐浴露水溶液，放置8分鐘後觀察結果！

介紹下呢張圓形試紙先！呢個測試方法，利用咗玉米醇溶蛋白嚟模擬肌膚入面嘅蛋白質。透過呢個方法，睇到液體接觸到玉米醇溶蛋白試紙之後，會溶解幾多玉米醇溶蛋白，就可以知道佢嘅潛在刺激性有幾大！如果試紙保留更完整嘅輪廓，周邊出現較少溶解嘅橙紅色成份，就證明清潔力更溫和啦！

結果好快就出爐！

Dove同威露士表現最好，可以睇到試紙嘅邊緣並無化開，證明對皮膚刺激性最低，係5款沐浴露入面係比較溫和嘅！滴露都有輕微溶解，但仍然可以見到圓形嘅輪廓。其次係Protex，而Lifebuoy溶解得最多。

4. 洗後感

試完非常科學嘅測試方法，都係要親身感受一下先得嘅～

滴露同Lifebuoy感覺清潔度都係比較高嘅，但洗完會有澀澀地嘅感覺；Lifebuoy泡泡比較厚重，洗完之後皮膚會乾乾地。而Dove同威露士感覺清潔度都係中等，威露士洗完會有涼爽感，相反地Dove係唯一一款洗完之後有滋潤感嘅！Protex係咁多款入面清潔度比較欠佳，但洗完會有少許冰涼感。

不過呢個只係TestingMama個人體驗感受，每個人感覺都係因人而異，大家可以當作一個參考啦～

5. 香味

洗白白除咗想變乾淨，梗係想香噴噴啦～等我聞一聞，再形容一下每款分別係咩香味啦！

6. 價錢

作為精打細算嘅媽媽，梗係想知邊枝最抵啦！即刻同大家List晒出嚟，仲計埋每ml嘅價錢𠻹！

（以上價錢以Testingmama購買時價錢作準。）

滴露除返開每ml都只係$0.0367咋！其次Protex同Dove都幾平，除返開都係$0.0389/ml 同 $0.395/ml！但最平又唔一定係最好嘅～大家喺買之前，記得整合所有表現，再衡量價錢作決定啦！

總結表

總括而言，Dove嘅保濕鎖水能力最高，溫和度都有唔錯嘅表現，用完皮膚會有滋潤感覺。而威露士嘅溫和度表現好，保濕鎖水度就稍微欠缺，洗後會有涼爽感，幾啱夏天用！價錢上就係滴露最平！

最後俾返個總結表大家參考啦！

相信各位媽子睇到呢度都知道每款沐浴露都各有所長，但始終每個人嘅皮膚狀態、個人愛好都唔一樣，揀選啱自己嘅沐浴露，先可以洗得開心又安心！

購買詳情：

Dove：https://bit.ly/3eLUbCX
威露士：https://bit.ly/3uzEDYR
滴露：https://bit.ly/3fJaDVW
Protex：Aeon
Lifebuoy：https://bit.ly/3vDX6Vv