大家好又係我Testingmama！睇開我哋嘅媽子就知，每年測試完尿片就到褲仔啦！早排見到大家留言話想我哋試多幾隻牌子啵，無問題！

今鋪一於玩盡啲，一口氣測試6隻牌子！分別係Pampers Ichiban 拉拉褲、Huggies Diamond 親膚學習褲、Merries 學行褲、Goo.N 學習褲 (男) 、Moony 學習褲 (男)、同Nepia Genki 學習褲。全部都係用大碼！

奄尖聲悶嘅Testingmama出名精益求精，呢幾日我已經絞盡腦汁度咗啲刁鑽測試出嚟，決定嚟個「 褲仔極限大測試」！

仲係史上第一次請嚟Testingbaby獻出肉肉臀，親身試晒呢幾隻褲仔！快啲開波啦喂！

第一關：透氣度

片芯

世界上最令人心痛嘅事，就係見到本身白滑嘅Pat Pat焗到紅晒！褲仔同片片一樣，一定要高度透氣，先冇咁易罨到紅Pat Pat！

但一條識呼吸嘅褲仔，世界上真係存在嗎？講多無謂，上架撐！

首先將褲仔夾喺中間，喺上層倒水，再喺下層泵入空氣！

Blu Blu Blu～Pampers、 Goo.N、Moony同Nepia都有好多泡泡啊！邊吸水邊透氣，真係識呼吸啊！

腰圍

講明係極限大測試，透氣度嘅極致係咩啊？經我屈指一算，就係連腰圍都要透氣啊！BB皮膚成日喺腰側髀側呢啲陰濕位焗到痕㗎！

將呢幾條褲仔嘅腰圍套喺霧化機上面，霧氣穿透得越勁，就代表越透氣啦！

結果出爐！呢一Round Pampers表現得最好，啲霧穿透得吧吧聲呀，而Huggies都好緊貼！其餘4隻一般般啦～

綜合片芯同腰圍嘅賽果，Pampers係整體上透氣度最高，揼返個印俾你啦！而Goo.N都幾唔錯呀！

第二關：吸水速度

褲仔嘅職責，第一千零一條就緊係吸Wee Wee啦！古語有云：「唔好急，最緊要快」。不要再說了，直入測試！

250ml 水 Ready、球證 Ready，3、2、1、Let’s go！！

最快跑出嘅係Pampers，只係用咗13秒，果然係名不虛傳！眨個眼Huggies同Nepia都吸完啦！其餘3隻就用咗20零秒先吸完。

第三關：防回滲力

BB呢種生物出名坐唔定，邊屙Wee Wee邊打關斗都仲得！所以褲仔除咗要吸得快，鎖水都要快，唔係一坐低同你唧返出嚟就真係喊三聲！

等褲仔吸完水30秒放張紙巾上去，由Testingbaby親自坐陣，再Check吓紙巾有冇濕先！

Moony冇咩水印啊，防回滲之極就係你啦！Pampers都表現得幾好，俾個嘉許獎你啦！

第四關：吸水量

一條褲仔嘅吸水極限可以去到幾盡呢？將佢哋過一過磅，浸落水30秒之後戥走多餘水份再磅重，咪知道囉！

登登！恭喜Goo.N勝出呢回合啊！佢同Moony都吸到過千gram水，俾個Like你！

不過提提大家著大碼褲仔嘅BB全日尿量都係600ml左右㗎咋，所以今次全部都過到關，唔怕吸唔晒，只怕你全日都唔幫阿B換褲仔啊！

第五關：腰圍彈力

作為一個吃貨B，食飽肚脹脹係好正常㗎！如果褲頭太緊唔夠彈性，勒到肚腩仔紅卜卜就慘慘豬啦！

將褲仔拉前拉後度一度，就知邊個最有彈性啦！

腰圍Size嚟講，Huggies本身就比較大件啲，而彈性嚟講，Merries同Pampers拉緊前後相差最多，證明彈力ichiban！

第六關：貼身度

媽媽谷成日有人問：邊隻褲仔Fit身啲？10個媽媽9個都有唔同答案！

不如就等Testingbaby直接試俾你睇啦！

為免搞喊人哋個B，都係等專業換片員－媽媽直接出手啦

Testingmama：根據你換褲仔多月嘅經驗，你覺得邊款貼身啲呢？

Testingbabay個阿媽：Pampers同Huggies嘅腰位、髀位都好Fit身，唔會太鬆太緊啱啱好！Nepia就好似會鬆咗啲，可能要著細一個碼～

Testingbabay個阿媽：而Merries、Pampers同Huggies都有比較大塊嘅防漏邊，BB郁嚟郁去都冇咁易漏！

呢個結果當俾大家參考吓啦！始終個個BB身形唔同，就算一樣重，脂肪分佈都可能唔同！

第六關：柔軟度

咁經過一輪肌膚之親之後，阿B你覺得邊隻最舒服呢？

好啦！唔玩你啦！問吓媽媽摸上手嘅感覺先！

Testingbabay個阿媽：其實隻隻都著唔多，片芯同邊邊位都幾柔軟，唔會刮肉～

既然你咁講，就俾你哋過關啦！呢Part都係主觀感受，就唔評分啦！

基本資料表 ＆ 總結表

好啦！循例送返個基本資料表同總結表俾大家啦！

嚟到尾聲，Testingmama要向經過今日嘅極限測試摧殘都仍然屹立不倒嘅褲仔講句：Respect！

希望今次條片幫到大家啦！下次想我哋測試啲咩呢？快啲留言話我知啦！Bye Bye！

#購買情報
Pampers Ichiban：https://bit.ly/2TYyOUJ
Huggies Diamond：https://bit.ly/3jIljCY
Merries：https://bit.ly/384fHB4
Goo.N：https://bit.ly/3ebKwVy
Moony：https://bit.ly/3jDYdxn
Nepia Genki：https://bit.ly/3jQjN1G