上次做完熱門奶粉比併之後，好多媽子想我哋試埋佢哋阿B飲開嘅牌子，順便解答埋一堆佢哋聽唔明嘅英文係咩東東。

所以Testingmama今次揀咗5隻人氣奶粉拆解佢哋嘅營養成分，各位媽咪上堂啦！

營養成分拆解

係媽咪都想BB健健康康咁成長，聽到啲廣告成日講咩成分ABCDEFG，真係成頭黑人問號啊！

Testingmama今日抽咗啲你一定要記住嘅成分出嚟，逐一同大家解釋下～拎定紙仔出嚟Mark重點啦！

首先就係你未聽過都睇過嘅HMO啦！

HMO即係母乳低聚糖，本身係母乳入面先有嘅成分，而家好多奶粉都加入咗，佢可以促進腸道益菌生長，支持呀B嘅腸道健康同免疫力！

下一位！MFGM？好似冇咩點聽講過啵！

原來佢同HMO一樣，都係母乳入面嘅成分，叫做乳脂球膜，坊間又叫佢做母乳黃金膜™，含有超過200種營養㗎！

有研究顯示，佢可以幫助阿B腦部發展，支持認知、語言能力發展，仲可以促進免疫系統發育，減少呼吸道同腸道感染機會等等⋯⋯

點解咁矜貴嘅嘢以前都好少聽過呢？因為每500kg天然奶奶入面先可以保留到1kg MFGM，真係滴滴皆珍貴！

之後有請～MOS、GOS同PDX！

佢哋都係益生元，係唔可以被人體消化嘅纖維，但可以喺大腸成為益生菌嘅糧食，支持阿B腸道免疫系統，軟化便便！Poo Poo順利，舒服晒！

Next！DHA大家就聽得多啦！但你又知唔知佢係大量存在喺我哋嘅視網膜同腦細胞入面，有助阿B智力同視覺發展㗎！

咁就唔爭在講埋BL益生菌啦。

佢又名比菲德氏菌，可以平衡腸道菌群，維持腸道健康，促進免疫系統成長！

好啦，講咗咁耐，俾大家睇返呢5隻奶粉有冇含有以上成分先！

今次5隻都有齊HMO同DHA，Good啊！而頭先提過嘅MFGM同PDX暫時得美贊臣 Enfa A+ NeuroPro有，BL益生菌就淨係得雀巢超級能恩有！

喂～大家唔好瞓著住，Testingmama點會齋講唔做，循例都要做返啲Test俾大家參考下！

無添加蔗糖

除咗雅培心美力HMO之外，其餘4隻都冇添加到蔗糖，俾個Like你哋！

試味

5隻入面最香就係美贊臣 Enfa A+ NeuroPro，美素佳兒金裝同illuma就有少少奶膻味，雅培心美力HMO奶味比較淡但偏甜，雀巢超級能恩都係一如以往，苦苦地咁啦。

沖奶奶

啲粉靚唔靚？當然逃唔過我嘅法眼啦！肉眼睇就美贊臣 Enfa A+ NeuroPro嘅粉質最幼細，illuma同雀巢超級能恩都唔錯啊，沖出嚟睇過先！

跟住包裝指引沖奶，再一齊搓30秒，睇下會唔會有啲未溶嘅結塊先！

登登！雅培心美力HMO同illuma都明顯見到有結塊！另外3款都溶得唔錯冇結塊喎！

第一屆冇獎問答遊戲

壓軸嘅就係「Testingmama第一屆冇獎問答遊戲」！考下你第一Part我提過嘅營養成分，睇下你哋有冇留心聽書！

第1題，HMO母乳低聚糖有咩功效？ 

1. 減少BB哭喊
2. 支持腸道健康及免疫力
3. 幫助BB一覺瞓天光

1…2…3…唔准諗，即刻答！答案就係C，你就想啦！係B啊！

第2題，母乳黃金膜™即係咩東東？

1. MFGM
2. ABCD
3. EFGH

登登，答案好簡單，就係A. MFGM！可以幫助阿B腦部發展同免疫系統發育嘅呢！

最後一題，以下邊個成分可以支持阿B腸道免疫系統？

1. TESTING、MAMA
2. GOS、MOS、PDX
3. OPPA、HYUN BIN

答案一定唔係HYUN BIN OPPA啊～唔好唔記得你仲有個B啊！所以答案係B啊！

恭喜答啱晒3題嘅媽子，證明Testingmama嘅心血冇白費到！

總結表

都係嗰句，母乳係阿B最天然嘅食糧！今日夠鐘落堂啦，Goodbye Class～