好多媽媽都會為BB買睡袋，市面上有好多睡袋，應該點揀呢？

靚媽自靚B未出世，已經開始研究睡袋，發現市面上既睡袋五花八門，雖然選擇多，但要揀適合既睡袋俾BB瞓得好，都要花點心機。

1. 保暖程度

大部分市面上有品牌既睡袋都有標示保暖程度。最常見是Tog的分級，例如 Tog 1.0，Tog 1.5，Tog 2.5。 數字越大，保暖程度越好，適合不同天氣。

不過，要注意Tog標示係根據歐洲氣候，香港天氣潮濕，同樣係16度既氣溫，係香港既體感溫度可能有別於歐洲。而且，香港天氣較暖，相對外國既小朋友，香港小朋友比較怕冷。例如， 標示Tog 2.5 保暖程度既睡袋，建議係適合16°至20°室溫。但實際上，靚媽覺得此數字參考指數不高。靚媽晚上會開冷氣睡覺，氣溫大概23°，根據Tog既標準，Tog 2.5 已足夠保暖。但事實並非如此，晚上熟睡時係人體體溫最低既時候，加上BB睡覺後會尿尿，當尿片濕透及身體靜止時，身體溫度會下降，Tog 2.5 絕對不夠保暖。

媽媽最好看看睡袋質地剪裁才決定購入。雖然同是Tog 2.5，但不同品牌既保暖程度都有差異。例如，英國品牌 Grobag既Tog 2.5 睡袋跟本地品牌 Mide睡袋，在保暖程度及布料上都有分別。前者建議於室溫16°至21°穿著，而後者則可於10° 至15° 作保暖。

而且，Grobag 只根據棉料厚度來區分保暖等級。而Mide Tog 1.5 或以下既睡袋都是夾棉，而Tog 2.5睡袋布面則用上fleece布，而且較厚。所以，不要只看Tog保暖標示，要親身選購。

 Grobag睡袋

 Mides睡袋

2. 布料

靚媽買過不同布料既睡袋，包括夾棉、fleece面層、及六重紗。

靚媽本偏好fleece質地，不過，要找全fleece睡袋也不易。即使是標榜fleece布料既halo，都不是fleece作內膽，而且感覺薄弱。所以，暫時覺得只有夾棉比較暖，而且有少許重量，睡覺比較有安全感。

 Halo睡袋

靚媽很喜歡買睡袋，又點少得買係睡袋界最hit既蘑菇六重紗睡袋呢？初初聽聞六重紗睡袋四季皆宜，透氣輕薄，蘑菇圖案也確實太吸引，所有係夏天時入手了一件。首先要讚一讚這件六重紗睡袋，是眾多睡袋中最易穿著既一件。如果大家有跟熟睡既BB著睡袋既經驗，就知一件易著既睡袋係好重要既事。如果睡袋好難穿著，要左扣扣右拉拉，就好易弄醒熟睡既BB，而且BB會左轉右轉，要著好件睡袋都要花點工夫。

依件六重紗蘑菇睡袋，係用“啪鈕”設計，而唔係拉鏈，係漆黑又寧靜既環境，絕對唔會有拉鏈夾到BB，而且唔會有“卡卡卡”既聲音。只是六粒啪鈕就可以好完美咁著好一件睡袋。而且，睡袋於褲襠位置有啪鈕，睡醒一覺都絕對無走位既問題，所以以安全及方便來說確實係No.1。不過，靚媽個人認為，如果以此睡覺時穿著，就只適合夏天（不開冷氣）及少許秋涼的環境，因為睡袋不包腳及透薄關係，天氣較涼或有冷氣室溫下，未必有很好既保暖效果。

靚媽有時會俾靚B午睡時穿著，因為下午氣溫比較和暖，容易出汗，在靚媽視線範圍下，無下半身加添一張被，就會又乾爽，又保暖。

再講，依張六重紗睡袋仲有一個吸引靚媽既地方，就係佢可以用來作背心外套使用，分腳設計，特別適合爬行BB。依款睡袋雖然價錢不太吸引，不過要係市面上搵到同等質素，但價錢較相宜既睡袋，則比較困難。

3. 剪裁設計

不要以為睡袋款款一樣，其實大有學問。正如上文所說，蘑菇六重紗睡袋啪鈕設計最易於穿著。同樣是出自Grobag既睡袋，則有兩款不同剪裁選擇。一是圓領則拉鏈設計，另一款是V領中間拉鏈設計。靚媽偏愛V領中間搵鏈設計。點解？如果你地既BB好似靚B咁怕熱，頭頸好易出汗，V領設計最適合，唔會包住晒條頸，而且中間拉鏈位，唔駛係漆黑既晚上分睡袍既底面?。

4. 安全設計

靚媽最留意睡袋腋下位置會否有啪鈕給睡袋定位，因為這是安全問題啊！大部份睡袋大多寛身，而且有一定重量，避免BB睡著，因睡袋過寛而令睡袋向上覆蓋，腋下啪鈕定位係極其重要。靚媽就自行將Grobag睡袋，拿去釘上啪鈕使用。而Mide暫時最為理想，保暖不錯，腋下亦有啪鈕設計，唯獨較難分底面。

 Mides睡袋

其實，靚媽到現時為止都未搵到一款perfect既睡袋，每一款睡袋總欠缺某些靚媽既要求。靚B仲有一段時間需要穿著睡袋，靚媽仍然會努力搜尋，到時再跟大家分享吧。

TestingMama Blogger：靚媽湊B記

靚媽對育兒產品一絲不苟。從產品成份到研究數據都精益求精，不盲從廣告或坊間流言，只求以獨立眼光嚴選最優質產品予靚B。深信寶寶能在安全無害的環境中健康快樂地成長，是每個媽媽的目標。