未有小朋友前，見到好多家庭最少都會有兩架BB車放喺屋企，就好想問:「洗唔洗呀? 多餘…….」。原諒老母年幼時太膚淺無知喇! 呢兩年做人老母經驗，明白點解要前後買兩部BB車!

初生BB好似豆腐咁脆弱，緊係揀一架瞓起黎舒服又穩陣安全，仲要好推好收又唔係成架坦克咁大嘅車仔啦。 不過比得初生用嘅，唔會輕得去邊，就好似我地用嘅COMBI Mechacal Handy Auto 4 Cas，產品介紹為4.9kg，堪稱超輕巧嘅嬰兒車。4輪360度轉動、手柄可以調教方向、單手收車等等，而家一般買3千幾蚊，算係合理帶少少肉赤。

  (當年阿姐坐Combi 車活像大爺)

廣告相永遠將形象做得美好，媽媽輕便到連背囊都唔洗帶。

但現實都知香港好多地方唔係提供比親子使用架啦，無斜路無電梯，得樓梯。有時一個女人仔一手抱起BB，另一邊單手收車，又唔係經常有途人伸出善良之手，左B右車咁樣上落樓梯，你都咪話唔危險呀! (當媽的辛酸)，顧得BB又顧唔到架車，最後都係唔帶BB車出街，用HIP SEAT 更方便。縱使妳有變形俠醫咁嘅一雙強臂與堅橫嘅背肌，BB重到某一個點時，用HIP SEAT都有極限，會勞損條腰、背、膊頭。所以我地兩公婆開始考慮買架方便、可以摺得細細架嘅車仔。

不過傳說中嘅”YOYO”車太貴喇，好似唔化算。另一個牌子GoodBaby Pockit 同樣都可以摺得細細，亦都可以成架車放入行李箱。價錢方面，如果選擇買第2代 咁都係 $1,500~$1,900。(Pockit現出左第3代，功能上有少許提升，不過價錢相對提升。)

睇價錢好似冇咁肉赤，就算9、10個月大開始用，應該用到兩年卦? 出街見到牛龜咁大嘅小朋友都仲坐到…加上比起一般士的車，外形感覺穩陣。

最後都係作出呢個英明決定，買!  (BB愈黎愈大隻，真係唔好辛苦媽媽自己)

  (阿姐初次坐Pockit情況)

不如係度做一個簡單介紹 (但唔講什麼吸震Egg Shock頭墊、車輪尺寸、有無什麼透氣墊呢啲marketing嘢)，好讓大家打算買BB車時可以從實際使用方向考慮：

1. 【開合大細比較】
   

   兩車開展後併埋size分別唔算太大，Combi 稍為闊，較為舒適。

     

   收起後，兩車size有極度明顯分別。唔洗諗，都知邊架收藏容易。

   

2. 【收車/ 開車嘅方便程度】
   

   的確係Combi贏過Pockit。Combi 單手開合，Pockit 一定要雙手噤安全制。如果單人匹馬帶BB出街，又要係特別情況下收車，而BB又未識企，都唔知點樣安置好BB先人手高速摺起架車……嗯…可能你衣家唔明，但用過你就知幾呢HEA。

    

3. 【單手力的表現】
   

   Combi 廣告入面嘅媽媽係輕便到飛起，而事實係笨重到飛起。加上如果你係哈比人高度 (本人156cm)，好辛苦地單手提起都好似就黎掂地，如果另一隻手仲要抱住BB……我會用溫柔而堅定既語氣勸你關注BB安全。

   Pockit 收起後滴骰，雖然兩架車重量差唔多，但係Pockit拎上黎爽手啲，無咁論盡。

     

4. 【貯物籃比較】
   

   兩車貯物籃算大，當然Combi (左)比起Pockit (右)嘅貯物空間更大。

   不過提提你，放得愈多野，BB車愈重，推起上黎亦都無咁輕便。仲要考慮如果需要收車上落，係貯物藍拎哂咁多野出黎係手先收車，非常狼狽。

    

5. 【安全帶配置】

   兩車都係用五點式安全帶，BB可以安全地坐係車仔內。

   Pockit 簡單啲，啪啪兩下就搞掂。Combi 有佢一貫風格，要將兩個配件併好，先啪落安全鎖，心急起上黎係會手殘的。

    

   正所謂大車有大車好處，可以放多啲野，唔洗用手拎。細車都有細車既方便，喺狹窄既地方都可以左穿右插。唔同家庭都適合唔同款式產品。

   買一架BB車唔係平，買返黎係打算經常使用，而收納空間都係考慮條件。人人都買歐洲BB車，唔通人人都想買歐洲BB車咩，除非你好富貴同屋企好大，實際使用習慣都好最重要。買之前多諗一步，思考成家出街既習慣同路線，都對考慮買邊款BB車有幫助架。

   兩款BB車嘅基本資料：

   

TestingMama Blogger：老母是這樣練成的

由主子出世一刻，少婦瞬間變成老母。湊B、泵奶、餵奶、加固、口味配搭，甚至所有關於BB用品，每日學習內容充實無比。汗與淚、力與脂肪成就世上千千萬萬的偉大老母。歡迎進入湊B世界。