【Testingmama Blogger分享】3款遊戲安全墊比拼！邊款安全又舒服？

購買BB用品係永無止境的，每個階段都突然覺得有嘢需要準備。

當BB到3, 4月大、可以趴係度舉起頭，爸媽們又係時候準備遊戲墊，以防阿B 突然一個鯉魚反身，咁就由床或梳化滾落地下，又或者可以放BB係墊上蠕動，進行親子活動。

老母前前後後換咗3款唔同嘅遊戲墊。今次按時序逐一分享：

第一張：【Fisher Price 單面包邊地墊】

見姑奶同奶奶屋企都有呢類墊，我地好正常都去係AEON搵差唔多款嘅地墊，好多size，方便按屋企大細去選擇，最後揀咗Fisher Price。

(厚度約1cm)

用後感：

其實張墊只係叫做墊住，佢嘅厚度只係1cm多少少，長訓係度會feel到地下嘅硬，同埋萬一真係梳化跌落黎並唔係唔痛，只係唔傷咁解……..

用咗3, 4個月，外面個層薄膠已經同中間嘅軟墊分離，形成好多個”氣泡”，可能我地會卷埋收起遊戲墊，不停卷曲容易兩層分離? 個表面起泡唔知幾時會爛、亦擔心會唔會比小朋友手指仔刮刮下裂開有碎片，所以不到半年，已經轉用另一款軟墊。

(兩層分離出現如氣泡的情況)

係Aeon 買咗旗下品牌Topvalu 嘅格格地墊，貪可以彈性地按廳嘅地理環境鋪上地墊。有數隻顏色揀，可以自由合併。

(墊厚0.6-0.7cm，舒服比不上第一款單面包邊墊，但都絕對好過佢。)

用後感：

有讚：$59.9/包，每包9塊，30 x 30cm 一塊，厚度將0.6 至0.7cm。計起上黎，都唔算好貴丫…

有彈：清潔絕對係大問題。

每一塊墊容易積污糟物及塵粒，尤其當小朋友開始加固、食餅仔，餅碎、飯粒總會無故亂入，只要一星期，揭起膠墊底下係污糟到不得了。如果日日揭起哂黎抹，都幾係嘢…. 除非有工人姐姐幫幫手。

另外，因為墊面有防滑紋，日常用消毒紙巾抹好似都唔可以一抹即乾淨。老母放工返黎已經有十萬樣嘢做，只能每日抹表面，每星期全部起出黎清潔。為咗方便，會用花灑逐塊沖洗、完全乾透，重新齊好再用。

(有罅隙，易藏污糟物)

如事者用咗大半年有多，阿姐嘅活動範圍早已不限於遊戲墊，又唔可以完全棄用，擔心一下子由梳化滾下就大件事，所以又想轉其他墊。韓國牌子個款有得摺嘅好心動的呀，但係太貴了成千蚊，真心唔捨得。曾經一段時間，IKEA出過一款類似嘅遊戲墊，之後再無返貨。

5月某日去IKEA，無啦啦見到有貨喎! 真高興~

網站資料列明適合18個月以上小童使用。而且有清楚指示布料含100%聚酯, 100% PEVA及填充物料為聚乙烯泡膠。(Google 一下才知PEVA 環保材質呢!)

(墊厚3.2cm)

(產品製造成分標籤，另外2款墊無咁清晰)

用後感：

有讚：清潔表面容易，每日用消毒紙巾抹一抹即可；
收埋摺起同樣方便；而且坐落去舒服，阿姐愛係上面打滾～

有彈：比起初新推出，價錢係貴咗。$329/塊 78cm x 185cm (4摺)。

暫時係3款遊戲墊中最滿意的。

每樣產品都有優點缺點哦，可能要浪費金錢時間去試才知適唔適合個別家庭使用。希望呢個用家體驗又幫到你，多一丁點IDEA 啦。

TestingMama Blogger：老母是這樣練成的

由主子出世一刻，少婦瞬間變成老母。湊B、泵奶、餵奶、加固、口味配搭，甚至所有關於BB用品，每日學習內容充實無比。汗與淚、力與脂肪成就世上千千萬萬的偉大老母。歡迎進入湊B世界。