12個月可以話係BB成長既一個重要的里程碑。既是出世一周年，亦是開始打開學習之門的年齡－－學行路、學說話、學獨立飲食等等等等，作為媽媽們當然義不容辭陪住BB，但是，選擇適合BB使用、陪住BB學習成長的好拍檔，對媽媽們來說可以話係一個考驗，而其中，學習杯更加係重要既一環。

於是，喜歡坐言起行的阿G媽就同大家分析一下呢三款12M+ 吸管學習杯有咩利弊，等大家揀學習杯既時候可以更加得心應手。

今次被選中做測試的三個牌子學習杯由左至右分別係：Hello Bebe、mOmma 同 Philips Avent。

呢三個牌子相信對各位媽媽黎講都唔陌生，一定會係百貨公司、各大BB用品零售商、網上零售店見過佢地，三個都係 made in China。

1. 外觀

首先講下外觀先啦（雖然呢樣野見人見智），不過阿G媽個人覺得 mOmma 最靚，跟住係 Philips Avent，最簡

陋係 Hello bebe（縱然佢上面D公仔幾 cute cute ..）。

不得不提既係，Hello bebe 杯身居然冇容量刻度！（唔通個Designer覺得所有媽咪都識目測？？）

2. 防漏度

Philips Avent 最防漏  >>   mOmma >>  Hello bebe 最易漏，基本上打側不斷滴滴滴滴漏出黎 …

3. 清潔及安裝難易度

Hello Bebe 最容易 >> Philips Avent  >> mOmma 最最最難清潔 ….

☟Hello Bebe 一眼睇晒，最易安裝同清潔

☟Philips Avent 可以全部配件拆裝清潔，而安裝亦很容易。

☟ mOmma 拆開之後就係咁，安裝唔難。

☟但係 mOmma 呢個收藏飲管既位置係超級超級超級極度難清潔，點解？因為佢裡面唔知點解要設計到一格一格，

但係其實支飲管又唔係收埋係個格裡邊（十分費解 …）媽媽們要係個杯關好既情況下逐格扭開，逐格清潔 … 然後清潔完先可以將杯蓋扭開，成個過程非常複雜 

4. 吸管易吸度

Hello Bebe 最易 >>   mOmma >>  Philips Avent 最難吸

Hello Bebe 飲管係普通細管，飲管軟，而且接觸到杯底，容易吸啜。

mOmma 係平時十字口的吸管，飲管底係圓珠設計，算是難吸。

Philips Avent 雖然是粗飲管，較硬一點，但飲到底時十分難吸，因為飲管未能接觸到杯底。

 5. 水杯耐熱度

Hello Bebe：攝氏 120度

mOmma ：攝氏120度

Philips Avent：攝氏110度

6. 容量

Hello Bebe：290 ml （但杯身無容量刻度）

mOmma ：250 ml

Philips Avent：260 ml

7. 價錢

Hello Bebe：$45

mOmma ：$91

Philips Avent：$68 

總結：

mOmma 雖然設計上好靚，但佢聲稱的不倒翁功能（可避免杯跌落地時飲管直接接觸地面）其實都係無用的，個杯要跌既時候，支飲管都係會有機會直接接觸到地面架啦 ..  再加上成隻杯好「阿炸」，帶出街好唔方便，價錢又極級貴⋯⋯

Hello Bebe 雖然係價錢最平，但連最基本的容量刻度都無，更加係超級易漏⋯但就可以單手開到，設計簡單，方便清洗。

Philips Avent 價錢中等，防漏功能做得好好，但佢支飲管係掂唔到杯底的，經常會飲剩。但三隻杯黎講，testingmama 還是會推薦中規中矩的 Philips Avent。