【TestingMama Blogger推介】BB清潔3寶:磨甲器、濕紙巾、矽膠牙刷

【TestingMama Blogger推介】BB清潔3寶:磨甲器、濕紙巾、矽膠牙刷


楠媽我兩個小朋友仲細個,手指仔又細,楠妹都係啱啱出牙仔~

所以我平日好小心同佢哋做好個人清潔,確保用嘅嘢安全~唔會整親佢哋,仲要夠乾淨!(師奶仔角度梗係諗埋係咪方便好用啦)~

今次我就想推介呢3樣嘢,因為用完覺得真係值得介紹嘅:

1) Combi 電動磨甲器

combi1

我平時一星期都會同楠妹磨兩次甲,因為BB指甲太長或者啲邊唔平滑,都好易刮親自己。

特點-

部機係跟三個磨頭嘅,適合唔同月數嘅BB啦。譬如0-3個月大嘅會用最軟砂紙嘅頭、12個月以上就可以用硬少少。

不過最正嘅嘢就係連媽咪都可以用㗎,因為有另外3個係大人啱用嘅磨頭:有得修短指甲啦、磨滑啲同埋去死皮。其實都算我自己半份禮物。

combi2

示範-

我就咁跟住BB塊指甲修都好易,因為佢個頭係360度同左右旋轉,就咁拎住部機郁少少已經OK。同埋佢可以調較速度,所以就返自己手勢同埋俾BB用就唔驚啦。仲有就係呢度有盞燈啦,如果你個B瞓緊,唔想開太光嘅燈呢就可以開埋啦。咁簡單我就搞掂啦~

combi3

記得磨完甲最好用濕紙巾抹走返啲碎屑!~同埋抹返乾淨啲手指仔唔怕有菌~

combi4

2) Baby Swipe 多用途嬰兒濕巾

剩係聽到呢隻濕紙巾係可以一次過,抹哂BB嘅patpat、手同面,我已經好想買嚟用!因為唔好睇少多用途嘅重要,好多其他牌子淨係可以用嚟抹patpat,抹咀同手仔又要分開買另一隻,變咗就要同時帶住兩包。

babyswipe1

我買之前,已經小心check咗佢啲成分先。之前睇新聞話有幾款濕紙巾會令到BB敏感,

咁呢隻就係韓國製造,用純水製成,冇致敏防腐劑,可以用嚟抹埋BB面同咀,唔怕佢哋laam laam吓食咗唔好嘅嘢落肚~

我買過啲唔好嘅濕紙巾,係太過薄啦,直情薄過普通紙巾,用嚟抹patpat係會好易穿又者滲出嚟,自己隻手都 hi 哂。

babyswipe2

咁我拎一張出嚟俾你哋睇吓。我一買返嚟,都係咁樣拎一張出嚟,睇下佢夠唔夠厚同埋係咪夠濕。

babyswipe3

Baby Swipe呢隻係比起我之前買嗰啲厚同韌。濕度我都覺得岩岩好,唔會太乾,又唔會濕到自己隻手都有水。同埋你見到呢度係有d凹凹凸凸嘅壓花紋,抹走污糟嘢係易啲,特別係抹BB有乾便嘅話就好快抹清。

我除咗喺屋企會用之外,出街其實係用得仲多,因為街外食嘢都好難成日有水俾BB洗手啦,我都會用呢隻濕紙巾同佢哋食飯之前抹手先。特別嘅係佢有抗菌成分,咁出完街,譬如去咗playhouse,掂咗出面嘅嘢呢,就可以抹走啲細菌先食飯。食完飯啦,我都會用嚟同佢哋抹嘴 仔。

babyswipe4

仲有一樣我覺得呢隻濕紙巾好好嘅地方,就係佢入面有透明質酸同埋蘆薈精華。其實我哋呢啲貪靚嘅媽媽自己洗面都識啦,清潔得太多有時驚會帶走咗水分,BB皮膚太乾嘅話,可能會紅patpat或者有濕疹㗎,所以有呢兩種成份就可以幫佢地保濕,唔會乾爭爭啦~

 

3) Jack n Jill 矽膠手指牙刷

jack1

楠妹到而家1歲2個月呢,最近有個good news,就係出咗第3隻牙啦!同埋我兩個小朋友都係用BLW嘅方式同佢哋加固,所以比起同年小朋友,佢哋係早啲食固體食物,所以我就好注重同佢哋做好口腔清潔,唔好俾啲食物嘅渣攝喺牙入面,搞到蛀牙。

之前我都係買呢隻牌仔嘅牙膏俾楠哥用,今次買埋佢嘅矽膠手指牙刷試吓同楠妹刷牙啦。

我聽過如果啲BB覺得唔舒服係會作嘔。好彩呢隻,無論係矽膠部分定刷毛,我自己feel完覺得都幾soft、同平滑,唔會刮到楠妹啲肉、啜住咁。

jack2

我覺得啱我用嘅位就係佢後面有啲凸出嚟嘅粒粒,用嚟按摩牙肉嘅位置。因為出緊牙仔,仲要出咁多隻,呢個過程佢哋係唔舒服,未習慣感受到有隻硬嘅牙。咁同佢按摩可以紓緩唔舒服、痛嘅感覺,安撫到佢嘅。咁就完成清潔好牙齒、牙肉、牙齦呢啲部位啦。

jack3

刷完之後我就一定會用蒸氣高溫消毒返,唔係就有菌㗎啦~或者煲滾水都可以消到毒嘅。

同埋最好用濕紙巾同BB抹下咀仔~就大功告成啦~

咁今次我就分享呢3樣我覺得好用嘅「BB清潔用品」,希望可以幫到各位媽咪,下次再睇吓有冇試到好用嘅嘢啦~Byebye~

 

======================================

Blogger:楠哥BLW日記